Өнгөрсөн аравдугаар сар бол урлагийн салбарынхны хувьд ээлтэй байсан гэхэд болно. Урлаг соёлын сайхан бүсгүйчүүдэд маань шагналын хур тасралтгүй буусан. Учир нь оны шилдэг эмэгтэй шалгаруулах ёслолын ажиллагаа хоёр ч зохион байгуулагдаж, бүтэн жилийн турш хийсэн уран бүтээлүүдээрээ урлагийн бүсгүйчүүд хүч сорьцгоосон. Үүний нэг нь “Космополитан” сэтгүүлээс зохион байгуулагдсан “Космо” бүсгүй  шалгаруулах ёслолын ажиллагаа.

Энэхүү ёслолын ажиллагаанд манай урлаг соёлын цөөнгүй төлөөллүүд уригдан ирж, тайзыг ёстой л нэг чимэглэх шиг болсон. Тэдний дотор ч загварын хүрээнээс нэлээдгүй байсан нь хурсан олны нүдийг баясгаад авна билээ. Тодруулбал топ модель Ч.Уранбилэг, Х.Болормаагаас эхлээд мисс Ч.Содтуяа гээд мисс, загварынхнаас урдаа барьдаг гайгүй хэдэн бүсгүйчүүд хүрэлцэн иржээ. Гэвч энэхүү үйл ажиллагаан дээр зарим нэг загварынхан таагүй уурь амьсгал гаргаад авсан байна. Нэлээд хэдэн жилийн өмнө загварын бүсгүйчүүдийг гоё биенээс цаашгүй, хувцасны гол хэмээн нэрлэж байсан. Тэгтэл Космополитан сэтгүүлийн хамт олноос санаачилсан арга хэмжээнд мисс Ч.Содтуяа хувцасны гол гэх үгийг бататгасан гэмээр үйлдэл гаргаад авчээ.

Учир юу гэвэл мисс Ч.Содтуяа маань тайзан дээр гарч шинэхэн модель охидыг “Топ модель” хэмээн андуу зарлаж , нүүрээ хийх газаргүй болтлоо булайгаа дэлгэж орхижээ. Мисс бүсгүйн хэл нь хальтирвуу, халамцуу байсан уу. Ямар ч байсан дээрх үгийг амнаасаа унагаж хурсан олныг гайхашруулаад авсан байна.

Уг нь топ модель хэмээх эрхэм цолыг загварын бүсгүйчүүд доод тал нь 10 жил тайзан дээр алхан байж авдаг гэдэг. Тэр утгаараа ч “топ модель” цол нэлээд нэр хүндтэй байдаг. Гэтэл хэний ч мэдэхгүй “жижигхээн” загвар өмсөгчдийг топ гэж зарласанд хүмүүс нэлээд гайхаж зарим нь жаахан таагүй санагдсанаа шууд илэрхийлж байсныг хэлэхэд илүүдэхгүй биз ээ. Мэдээж хэрэг үүнд “жинхэнэ” топууд юу гэж тоолгүй өнгөрүүлэхэв. Ямарсайндаа мисс, загвар өмсөгч Ч.Содтуяаг “топ”-уудыг ч ялгалгүй согтуурхав хэмээн ярьж байлаа.