ҮСАХ буюу бидний нэрлэж заншсанаар улсад  ганцхан байх томоохон парк маань өнөөдөр багахаан зай талбайд өндөр үнээр хүүхэд багачуудыг баярлуулах үйлчилгээг нэвтрүүлээд байгаа.

Өнгөрсөн амралтын өдөр ҮСАХ-г зорилоо. Хэдхэн хоногийн дараа Хүүхдийн эрхийг хамгаалах өдөр буюу Хүүхдийн баяр болно. Энэ баяр болох гэж буйтай холбогдуулан тус газрыг хэрхэн бэлтгэж, ямар үнэтэйгээр үйлчилгээ  үзүүлэх гэж буйг сонирхлоо.

Үнэндээ парк руу нялх жаахан хүүхэдтэй тэр тусмаа машингүй явахад бэрхшээлтэй санагдав. Учир нь Паркийн чиглэлд ганцхан л шугамын автобус зогсдог юм байна. Харин хэдэн талаас нь барилга барьж битүүлсэн учраас араас нь, хажуугаас нь нэвтрэх ямар ч боломжгүй. Зөвхөн урд талын хаалгаар дотогш нэвтэрнэ. Нэвтрэхдээ 1000 төгрөг төлнө. Энэ бол Нарантуул захын хаалгаар нэвтэрдэг байсантай адил жишээ. Энэ нь шударга өрсөлдөөний тухай хуулийг зөрчиж байгаа хэмээн үзэж  ШӨХТГ-аас арга хэмжээ авахаар болоод буй. Гэхдээ Нарантуул захаас даруй хэд дахин илүү мөнгө төлнө гээд бод доо. Дотор байрлах цөөхөн хэдхэн тоглоом дээр тоглохын тулд мөнгө төлж байж нэвтрэхдээ хүртэл мөнгө төлнө. Ичиж үхмээр ашиг хонжоо…

Монголд анх удаа ийм тохилог орчинг бүрдүүлсэн учраас олноос шүүмжлэл хүртээд байдаггүй ч үнэ болоод давчуухан газарт үйл ажиллагаа явуулдаг болсонд нь таагүй хандсаар байгаа. Машины зогсоол, орчны тохижуулалт, үүд хаалга, бие засах газар, хог хаях цэгүүд, тамхи татах газар зэргийг урьд өмнөхтэй харьцуулшгүй. Урьд 35.9 га газартай байсан хүүхдийн паркийн газрын 10 хувь нь хувийн хэвшлийнх болжээ. Хүүхдийн паркийн хашаан дотор одоогоор 3 компани хаанаас зөвшөөрөл авсан нь үл ойлгогдох байдлаар байрлаж байна.

Өнөөдөр Паркт 4000-6000 мянган төгрөгийн үнэтэй нийт 14 автомат болон цахилгаан тоглоом ажиллаж байна. Тоглоом тус бүр тарифтай, тоглох хүүхдийн нас өндрийг хүртэл заажээ. Тодруулбал, Алсыг харагч дээр л гэхэд 140 см-ээс дээш өндөртэй хүүхдийг суулгана, тэрнээс доош буюу 10-аас доош насны хүүхдийг харгалзах хүнтэй суулгана гээд метр байрлуулаад санамж хадчихсан харагдав. Бусад тоглоом дээр ч мөн ялгаагүй иймэрхүү санамж зохицуулалт хийсэн байлаа.

Хүүхэд болсон хойно бүх тоглоом дээр тоглож үзэхийг хүсч ээж аавыгаа сандаргана. 14 тоглоомны хоёр нь 6000 мянган төгрөгийн үнэтэй бол бусад нь 4000 төгрөгийн үнэтэй. Бүх тоглоом дээр тоглоход 60 мянган төгрөг болно.

Хүүхдээ тоглуулах боломжтой аав ээж байхад боломжгүй нь маш олон бий. Боломжийн орлогогүй аав ээжтэйдээ хүүхэд бусдаасаа дутуу баярлах ёсгүй. Харин ч бусад хүүхдүүдийн адилаар тоглон баярлаж болдогийг мэдрүүлж болмоор санагдана.

Хаалгаар ороход 1000 төгрөг авч, хэдэн талаас нь барилга шавчихсныг нь харахад үүний цаана бяцхан хүүхдүүдээс илүү ашиг хонжоо чухал байгааг илтгэнэ.

Эх сурвалж: Шуурхай.мн