Одоогоос жил гаруйн өмнө “100 мянган айлын орон сууц хөтөлбөр” нэртэй иргэдийг орон сууцжуулах үйл ажил­лагаа ид өрнөж байв. Жилийн зургаан хувийн хүүтэй зээлийг төрөөс олгож, иргэд барилгын компанитай гэрээгээ хийж, урьдчилгаагаа төлсний дараа зээлээ авна гэсэн гурван талын оролцоотой хөтөлбөр хэрэгжиж эхэлсэн юм.

Харамсалтай нь энэ хө­төлбөр сонгуулийн дараа­гаас сураггүй болсон. Өнөөдөр улстөрчдийн энэхүү үйлдлээс болж 200 гаруй иргэн гу­дамжинд гарах дээрээ тулаад байна.

Орон сууцтай болохын тулд хашаа байшин, машин тэргээ зарж чемодантай хувцсаа бариад ах дүү на­рынхаараа толгой хоргодож яваа тэд сүүлдээ арга му­хардаж ийнхүү өлсгөлөн зарлахаар болоод байгаагаа өчигдөр мэдээллээ.

Учир нь зургаан ху­вийн зээлд хамрагдахаар урьд­­чилгаагаа өгсөн иргэд байр захиалсан компаниу­даа­саа төлсөн мөнгөө авах гэхээр алданги тооцож 10 ху­вийг нь суутгана, үгүй бол зур­гаа­дугаар сарын 1-нээс өмнө байрны төлбөрөө бүрэн хий гэсэн албан бичиг өгдөг гэнэ.

Шинэчлэлийн Засгийн газраас жилийн найман ху­вийн хүүтэй ипотекийн зээл олгож, хамгийн түрүүнд “100 мянган айлын орон сууц” хөтөлбөрт хамрагдаж ча­даагүй иргэдэд олгохоор яриад сар гаруй хугацаа өнгөрч байна.

Гэвч энэ зээлд өнөөдрийг хүртэл ямар нэгэн журам дүрэм гараагүй байгаа нь ийнхүү иргэдийг бухим­дуулахд хүргээд байна.

Орох орон, унах унаагаа зараад байрны урьдчилгаанд өгсөн иргэдэд байдал хүнд байгаа нь мэдээж.
Харин Монгол­­банк Зас­гийн газартай хамтран хэ­рэгжүүлж буй ипо­текийн зээлийг нийлүү­лэлтийг нэ­мэг­дүүлэх бодлогоо хэрэг­жүүлсний эцэст журмыг нь гар­гахаа мэдэгдээд байгаа.

Иргэдийн хувьд хэрвээ энэ асуудлыг ойрын хугацаанд шийдэхгүй бол өлсгөлөн зар­лахаа мэдэгдээд байна.

Иргэн Д.Булганчимэг “Зур­­гаадугаар сарын 1-нээс гэрээг цуцалж төлсөн төл­бөрийн 20 хувийг авна, орон сууцад орсон иргэдийг хөөж гаргана гэж байна. Бид хавар гудамжинд гарахад бэ­лэн бай­гаагаа төр засгийн удирд­лагуудад хүргэж байсан. Ха­рин өнөөдөр эхнээсээ гарч байна.

Энэ асуудлыг шийдэх гэж бүх шатны төрийн бай­гууллагуудаар явсан ч бие бие рүүгээ чихээд байх юм. БХБЯ-наас нэгдүгээр улиралд багтаан урьдчилгаа төлбөрөө төлсөн иргэдийн асуудлыг шийднэ гэж байсан ч одоо хоёрдугаар улирал дуусч бай­хад шийдсэн асуудал нэг ч алга. Тиймээс ирэх Засгийн газрын хуралдаанаар найман хувийн зээлийн журам бат­лагдахгүй бол бид өлсгөлөн зарлана” гэв.

Бидний хохирлыг барагдуулахаас нааш өлсгөлөнгөө зогсоохгүй

Хэвлэлийн хуралд оролцож байсан Б.Одончимэгээс дараах тодруулгыг авлаа.

-Орон сууцны урьдчилгаа хүссэн иргэдийн судалгааг гаргасан уу?

-Зарим нэг бололцоотой нь арилжааны банкнаас зээл аваад асуудлыг шийдсэн. Ор­лого багатай, юу юу ч үгүй иргэд нь л гудамжинд гардаг дээрээ байна шүү гэдгийг сайд дарга нар ойлгоосой.

“100 мянган айлын орон сууц” хөтөлбөрөөс болж хо­­хирсон иргэдийн ихэнх нь буюу 90 хувь нь нялх хүү­хэдтэй залуу гэр бүл байгааг мөн анхаарч үзээ­сэй. Бидний хохирлыг бараг­дуулахаас нааш жагсаал, өлсгөлөнгөө зог­соохгүй.

Өнөөдөр Монгол Улсын Засгийн газар “100 мянган айл орон сууц” хөтөлбөрийг хэрэгжүүлнэ гээд л байсан. Ту­хайн үед одоогийн Ерөнхий сайд Н.Алтанхуяг Шадар сай­даар ажиллаж байсан учраас бид энэхүү шаардлагыг тавих эрхтэй. Ер нь тэгээд энэ хө­төлбөрөөс болж хохирсон 4000-аад иргэн байна гэсэн судалгаа бий. Эдгээр хохир­чихоод байгаа 4000 хүний ард 3-5 ам бүл байгаа гэж бодохоор 12.000-20.000 хүний эрх ашиг хөндөгдөж байгаа.

-Захиалсан байр нь ашиг­лалтад орчихсон уу. Барилгын компаниас ямар шаардлага тавьж байгаа вэ?

-Аль хэдийнэ ашиглалтад орсон. Барилгын компаниуд аз болоход бид бүхнийг шахаж шаардахгүйгээр, харзнасан байдалтай байна.

Тэд ч бас өндөр хүүтэй зээл авч барилга барьсан байж таарна. Тийм болохоор аль болох түлхүүрээ иргэддээ хурдан өгч мөнгөө авмаар байгаа шүү дээ.

-Суултад оролцож байгаа хүмүүсийн хувьд ямар ком­паниудад байр захиалсан бол?

-Арав гаруй компани бий. “Заг”, “Жонаттан”, “Буян­билэг”, “Есөнбүрд”, “Ноёд” групп зэрэг компанид байр за­хиалсан хүмүүс байгаа.

Д.Баяржаргал
Эх сурвалж: