“Modern Nomads”-ын “City Nomads” сүлжээ ресторан нь Монголдоо тэргүүлэгч хоолны сүлжээ рестораны нэг билээ. Гэтэл тус газрын хийсэн хуушуурнаас ямар амьтных нь үл мэдэгдэх нэгэн шүд гарч ирсэн мэдээлэл өчигдөр олон нийтийн сүлжээгээр багагүй шуугиан дэгдээлээ.

Хүнсний аюулгүй байдлын тухай хуулийн хэрэгжилт өнгөрсөн сараас хэрэгжсэн ч энэ мэт хуулийнх нь хэрэгжилтийн эсрэг үйлдэл гарсаар. Тэгээд бүүр өндөр зэрэглэлийн хоолны газарт шүү дээ.

Үйлчлүүлэгч энэ талаар холбогдох хүмүүст нь гомдол гаргаж  арга хэмжээ авахыг шаардсан боловч үйл ажиллагаа хариуцсан захирал н.Даваажаргал гэх эмэгтэй асуудлыг хүлээн зөвшөөрөхгүйн дээр “хөл чинь хүрэх бүх газраараа яв” гэж уурлан зандарсан гэж хэвлэлүүдээр бичжээ.
Олон төрлийн хоолоороо үйлчлүүлэгчээ татдаг тус газар хоолны эрүүл ахуйн шаардлагыг энэ мэтээр хангадаг бололтой. Элдэв тайлбар хийж, үйлчилгээгээ магтах хэдий ч идэж байгаа хоолноос нь мал амьтных нь мэдэгдэхгүй соёо шиг шүд гараад ирвэл хэн ч байсан бухимдах нь аргагүй буйзаа.
Ямартаа ч үйлчилгээгээрээ дээгүүрт ордог газруудын үйлчилгээний шаардлага нэг иймэрхүү байгааг холбогдох харьяа дүүргийн мэргэжлийн хяналтын албан хэрхэн анхааралдаа авсан бол.

Энэ явдлын талаар хэрхэн арга хэмжээ авсан талаар бид эргэн мэдээлэх болно. Иргэдийн ходоод хогийн сав биш. Тиймээс эрүүл монгол хүний төлөө бид бага ч гэсэн зүйлд санаа тавин ажиллах хэрэгтэй болов уу.