УИХ-ын ээлжит сонгуулийн өмнөөс эхлээд улс төрөөс хөндийрсөн МАН- ын лидерүүдийн нэг С.Баяр ил гарчээ. УИХ-ын сонгуульд нэр дэвшээгүй, орон нутгийнхад ч мөн намын фигурын хувьд үүрэг гүйцэтгээгүй, ерөнхийдөө улс төрөөс хөндийрсөн тэрбээр саяхнаас олон нийтийн интернэт сүлжээнд нэгдсэн байна. “Монгол улсын минь ирээдүй тунгалаг, төгөлдөр байг” хэмээн ганцхан өгүүлбэрээр жиргэсэн С.Баяр хоёрхон өдрийн дотор гурван мянган дагагчтай болжээ. Харин тэрбээр өөрөө Ерөнхийлөгч асан Н.Багабанди, УИХ-ын гишүүн Сү.Батболд, С.Дэмбэрэл, Оросын Ерөнхий сайд Дмитрий Медведев нарыг дагажээ. “Ерөнхийлөгчийн сонгуульд өрсөлдөх гэж байгаа гэнэ”, “Саусгоби сэндс”-тэй холбоотой асуудлаар канад эрд гөвшүүлчихэж, “Канадын иргэн болжээ”, “Аав болж, анхны хүүгээ өлгийдөж авсан” гэсэн үнэн худал нь мэдэгдэхгүй шуугиан олон нийтийн дунд салхинд туугдсан түймэр шиг дэгдээд байв.

Харин тэрбээр энэ бүх асуултуудад хариулт өгч, дуугарахаар болжээ. Эх сурвалжаас авсан мэдээллээр тэрбээр Канад Улсаас иргэншил хүссэн эсэх, Оюутолгойн гэрээний эргэн тойрондох асуудлаар өөрийн байр сууриа илэрхийлэн, өдөр тутмын сонинд ярилцлага өгөхөөр болжээ. Мөн МАН- ын өнөөгийн байдлын талаар байр сууриа илэрхийлж, ирэх Ерөнхийлөгчийн сонгуульд нэр дэвших үү гэсэн асуултад эцсийн байдлаар хариулж байгаа гэнэ. Яг одоо дээрх сэдвийн хүрээнд өрнөж буй үйл явдлууд олны анхаарлыг татаж буй. Сонгуулийн үр дүнгээс шалтгаалан намаа шинэчлэхийг шаардсан олон жигүүр, фракц ургаж, үнэндээ МАН үүрээ эвдүүлсэн шоргоолж шиг бужигнаж байгаа. Мөн монголын талд ашиггүй хийгдсэн гэгддэг Оюутолгойн гэрээг шинэчлэх хувь нийлүүлэгчдийн хэлэлцээр эхлээд буй. Ирэх зургадугаар сард болох Ерөнхийлөгчийн сонгуульд С.Баяр нэр дэвших эсэхийг ард түмэн, улс төрийн намууд, нэр дэвшигчдийн аль аль нь сонирхож байгаа. Харин дээрх сэдвүүдэд хамгийн их сэжмээр холбогдож буй С.Баяр ил гарч, эргэлзээтэй олон асуултад хариулт өгөхөөр болсон нь энэ аж.

Б.Энх