Өнөөдөр МАХН-ын бага чуулган хуралдана. Хуралдаанаар өчигдөр 19.00 цагт намын Гүйцэтгэх зөвлөлөөр хэлэлцэж баталсан

асуудлаа хэлэлцэн шийдвэрлэх юм.

Юуны түрүүнд намын дарга Н.Энхбаярын биеийн байдал болон Ерөнхийлөгчийн сонгуулиар МАН-тай нэгдэн орох эсэх асуудлыг хэлэлцэх тухай эх сурвалж мэдээлэв.

Гэхдээ МАН-тай гэхээсээ илүүтэй АН-тай хэрхэн хамтран ажиллах талаар гишүүдтэйгээ санал солилцох бололтой. Хууль зүйн дэд сайд Э.Эрдэнэжамъяны хэлснээр Ерөнхийлөгчийн сонгуулиар хамтрах асуудлаар эхлээд АН-тай ярь гэсэн чиглэлийг Н.Энхбаяр дарга нь өгсөн аж. Тодруулбал, тэрбээр “Бидэнд АН-тай хийсэн гэрээ байгаа. Гэрээний үндсэн нөхцөл бол орон нутгийн болон Ерөнхийлөгчийн сонгуульд МАХН, АН хоёр хамтран оролцох тухай асуудал шүү дээ. Орон нутгийн сонгуулиар хоёр нам гэрээнийхээ үүргийг хэр биелүүлсэн бэ гэдэг дээр яриа гардаг нь үнэн.

Энэ сарын 27-нд манай намын бага чуулган болно. Түүгээрээ хоёр намын хооронд байгуулсан гэрээний хэрэгжилтийг дүгнэж, цаашдын бодлогоо тодорхойлно” гэжээ. Өөрөөр хэлбэл, хэрэггүй гээд хаясан ах намынханд экс Ерөнхийлөгч тийм ч амархан “За” гэж хэлэхгүй нь бололтой. Уг нь МАХН-ын дарга Н.Энхбаяр, Н.Удвал нар “Хоёр нам нэгдэхэд асуудал байхгүй” хэмээж байсан. Гэхдээ нэгдүгээрт АН-тай ярилцаад дараагийн хувилбарыг сонгох шаардлагатай бол МАНтай хэлэлцээрийн ширээний ард сууж болох юм гэсэн чиглэлийг намын нөхөддөө өгсөн аж.

Өөрөөр хэлбэл, ах намынханд ашиглуулаад өнгөрөхгүйн тулд асуудлыг тал бүрээс нь судалж, ул суурьтай хандахыг ч Удирдах зөвлөлийн гишүүддээ анхааруулсан гэх. Иймээс л өнөөдрийг хүртэл амаа чимийжээ. Харин Ардын намынхан хэдийнэ байр сууриа илэрхийлж, хадаг сүүгээ бэлдчихсэн өнөө, маргааш хоёр үргэлжлэх бага чуулганы үр дүнг хүлээж суугаа. Гэвч тэдний хүсэн хүлээсэн үр дүн гарна гэхэд эргэлзээтэй боллоо. Гишүүн Ц.Нямдорж, Э.Мөнх-Очир нараас эхлэн МАХН-ынхан руу дайралт хийж, элдвээр цоллох болсон тул эксийн багийн зарим нөхөр ч хоёр намын нэгдлийн тухай бодлоосоо ухарч байгаа сурагтай. Магадгүй хатуу самрыг зөнөжээ гэж бодоод өнгөрсөн явдлыг мартаж болох ч Н.Энхбаяр хүсэхгүй байгаа нь Хууль зүйн дэд сайдын үгнээс харагдаж байна. Иймээс Ц.Элбэгдоржийн эсрэг хүчтэй байхын тулд нарсанд суугаа Н.Энхбаярыг ашиглана гэх ах намынхны хэтийн төлөвлөгөө ч энэ хүрээд нурав бололтой.

Харин ч бүр түрүүлж дуугарсан хөхөөний ам хөлдөнө гэгчээр Ө.Энхтүвшин дарга Удирдах зөвлөлийн гишүүдийнхээ хамт журмын нөхдөөсөө “ял” сонсч мэдэх нь. УИХ-ын гишүүн Д.Загджаваас эхлээд намын Удирдах зөвлөл бүрэн бүрэлдэхүүнээрээ огцрох учиртай хэмээн хоёр гараа өргөөд гүйж явна. Түүний хэлж байгаагаар МАН-ын явуулж байгаа улс төрийн үйл ажиллагаа ямар байгаа вэ гэдэг нь алган дээр тавьсан мэт ил харагдах болж.

Энэ нам өмнө нь ийм байгаагүй юм. Одоо ямар арчаагүй байдалд орчихлоо гэж олон түмэн болон намын гишүүд, дэмжигчид халаглаж байгаа нь бодит үнэн хэмээн онцолсон байна лээ. Намын орон тооны бус нарийн бичгийн дарга Э.МөнхОчир ч ийм санаа бодолтой яваа тухайгаа хэвлэлийнхнээр дамжуулан нийтэд хүргэсэн байсан. Тэгэхээр Н.Энхбаяр “Үгүй” гэж хэлбэл Ө.Энхтүвшин намын даргын суудлаа ч өгч магадгүй эрсдэлтэй байдалд орох нь. Аль нэг нам нь татан буугдаж эвлэлдэн нэгдэхээсээ илүүтэй Ерөнхийлөгчийн сонгуулиар эвсэж орох гэсэн түүний төлөвлөгөө “ял” сонссоноор дуусах нь гэдгийг дээрх нэр бүхий эрхмүүд анхааруулаад эхэллээ.

Намын их хурлаа сонгуулийн дараа гэж хойшлуулан байж Н.Энхбаярыг хэлэлцээрт урьсан нь ийнхүү мань хүнийг хамраар нь шороо үмхүүллээ. Үнэндээ ч Ө.Энхтүвшинд одоо эсвэл сонгуулийн маргааш суудлаа өгөх хоёрт чанарын ялгаа гарахгүй мэт. Хэрэв ах намынхан Ерөнхийлөгчийн сонгуульд ялагдал хүлээвэл хүссэн хүсээгүй Ө.Энхтүвшин огцорно. Тиймдээ ч хөшигний ардаас С.Баяр, У.Хүрэлсүх нарын хүмүүсийн нэрс цухалзаж, үе үехэн ил гарах болсон биз.

Тэдэнд хүрд эргүүлэх боломж бий болсон учраас. МАХН-ынхны хувьд дээрх асуудлаас гадна Эрүүл мэндийн сайд Н.Удвалд хариуцлага тооцож, намын даргынхаа эрүүл мэндийг “нэхэмжлэх” бололтой. Н.Энхбаярын эрүүл мэнд доройтож, эмнэлгийн тусламж үзүүлэх шаардлагатай байгаа ч хүлээж авах газар олдохгүй байгаа нь Н.Удвал сайдад ял тулгахад хүргэжээ.

Өөрөөр хэлбэл, эрүүл мэндийн салбарынхан экс Ерөнхийлөгчийг эмчлэхээс татгалзаж буй явдалд салбарын сайдыг нь буруутгаж, мөн намын гишүүн нь атлаа даргаа эмчлүүлчихэж дөнгөхгүй байгаа Н.Удвалыг “цаазын тавцанд” дуудахад хүргэв бололтой. Ийнхүү хэд хэдэн асуудлыг бага чуулганаар хэлэлцэхээр төлөвлөсөн нь олны анхаарлыг татаж байна.

Л.Нинжсэмжид

/Нийгмийн толь/