Сүүлийн үед УИХ-ын гишүүд үндсэн ажлаа арай гайгүй хийх болж 70 гишүүн хуралдаа  сууж  “дээд амжилт” тогтоосон удаатай. УИХ-ын Тамгын газрын ажилтнууд үүнийг “З.Энхболд  даргын занга­раг”-тай холбон тайлбарлаж байгаа.

З.Энх­болд дарга час­хий­сэн хэ­дэн үгийг хэрэгтэй үед, шаардлагатай хүмүүст нь цагийг олж хэлээд байх болов.

Өвөрхангай аймгийн Уянга  сумын ажил бай­дал­­тай танилцаж явахдаа УИХ-ын дарга З.Энхболд ард иргэдийн дарга нараасаа хүлээж байдаг төрийн хүний зангаргийг үзүүлж, хариуцлага алдсан нөхдийг чангахан чимхээд авсан. Улсын төсвийн 2.5 тэрбум төгрөгөөр баригдаж байгаа ерөнхий боловсролын дунд сургууль, 800-аад сая төг­рөгөөр босч байгаа соёлын тө­вийн үйл ажиллагаатай танилцахдаа УИХ-ын дар­гын хэлсэн үг өнөөдөр Монгол улсад ус агаар мэт хэрэгтэй байгаа юм.

Долдугаар сард ашиг­лалтад оруулах  ёстой  байсан 640 хүүхдийн сургуулийн  барилгын гүйцэтгэл 80 ор­чим хувьтай байгаа нь З.Энхболд даргын уурыг хүргэх хангалттай  шалтгаан болсон.

Төсвийн 2.5 тэрбум төгрөгийг залгичихаад өнөө­дөр ч “мөнгө хүрэлцэхгүй байна” гэсэн тайлбар хийж суугаа “Темон” констракшн ХХК-ийг хар дэвтэрт бүрт­гэж, дахин тендерт орол­цуулахгүй байх хатуу үүр­­гийг  Өвөрхангай аймгийн Засаг дарга Д.Тогтохсүрэнд өгсөн нь  иргэдийн хувьд ёс­той л “загатнасан газар нь маажих” шиг л боллоо.

Мөн соёлын төвийн ба­рилгад 800 саяыг нялчихаад байгаа ч өнөөдрийн хувьд” араг яс”-тай зууралдаж суугаа компанийг шүүхэд өгөхөөр болж байгаа нь “Монгол төрд зайран байгаа л юм байна” гэх урам зоригийг хүмүүст төрүүлж гялайлгасан хэрэг болоод байна.

З.Энхболд дарга яван чангарч, зангаргаа үзүүлэх болжээ.

Өглөөний сонин