1990 оны Ардчилсан хувьсгалын анхдагчдын нэ­гэн  Г.Бошигт 71 насандаа  ганц хүүгийнхээ аминд хүрч айм­шигтай хэрэг тарь­жээ.

Тэрбээр ардчилсан хувьс­галын гол онолч гэгдэн тэм­цэж, жагсаж  явахдаа  цоч­мог хурц ааш зангаараа нийгэмд өөрийгөө сайтар та­ниулсан нэгэн. Харин аавынхаа гарт амиа алдсан ганц хүү Б.Хангарьд нь Оросын холбооны улс, АНУ-д сургууль төгссөн манайдаа дээгүүрт орох орос, англи хэл­ний орчуулагч байжээ.

“Монголын нэгдсэн хө­дөлгөөн”-ийг үүсгэн бай­гуулж 1990 оны ард­чилагч­дынхаа  эсрэг хоёр жил гаруй тэмцсэн Г.Бошигт хальтирч унан хөлөө гэмтээж гэртээ хэвтэж байхдаа хүүтэйгээ хоёул архи уусан байна. Халамцсаныхаа дараа тэд маргалдаж, Г.Бошигт ууран­даа хүүгээ хоёр хут­галан амийг нь хороожээ. Эхнэр, охин хоёр нь АНУ-д суурьшин амьдраад бага­гүй хугацаа өнгөрүүлж бай­гаа тул Г.Бошигт гуай сүү­лийн үед  санаа  сэтгэл ба­рагтайхан, багагүй архи бал­гадаг болоод байжээ.

“Тэнгис” кино театрын хойно байх гэртээ  багагүй архи ууж, хүүтэйгээ таарамж муутай байдаг байсан нь  орцных нь айлуудад нэлээд хүндрэлтэй байсан гэнэ. Ийнхүү архи хэмээгч  балагтай ундаа нэгэн айлын амьдралыг орвонгоор нь эргүүлж  Г.Бошигт гуай данайгаад сууж байх 70 насандаа шоронгийн хаалга татах болоод байна.

Аавынхаа гарт амиа алдсан хүү Б.Хангарьд нь МАХН-ын төв байранд  “Бошигт сан” байгуулан  ажиллаж  өвөлжилт хүндэрсэн аймгуудад  тусламж үзүүлэх, хүнд өвчтөнүүдэд  хандив үзүүлэх зэрэг буянтай ажил хийж байжээ.

Ийнхүү 40 хүрсэн нэгэн сайхан эр харамсалтайгаар хорвоог орхиж  аав нь гэмт хэрэгтэн боллоо. “Сархад савнаасаа бусдыг дийлдэг” хэмээдэг нь ийм л гашуун үнэн ажээ.

Өглөөний сонин