Сүүлийн үед эксийн багийнхан шинэчлэлийн Зас­гийн газрын тэргүүний албан өрөө рүү гүйдэлтэй болсныг шаргал ордны “жиргээчид” сонирхон ажих болов. Өчигдөр үдээс хойш ч гэсэн Хувьсгалт намын нөлөө бүхий эрхмүүд “тэхийн зогсоолдоо” өнжлөө. Энэ өдөр МАХН-ын дарга Н.Энхбаярын хүү Э.Батшугар, Хууль зүйн дэд сайд Э.Эрдэнэжамъяан тэргүүтэй уг­шил нэгт намынхан Ерөнхий сайдын албан өрөөгөөр хоёр гурваараа дөрөө харшин орж, гарч харагдсан.

Хэдийгээр Э.Батшугар намынхаа харь­яал­лаас татгалзаж, төрд хоёр­гүй сэтгэлээр зүтгэх андгай тавьсан ч үрийн санаа хэнд байх нь ойлгомжтой. Энэ нь ч эцэг, эхээ туйлаас эрхэмлэн хүн­дэлдэг монголжуу ухаг­дахуун. Тэр ч утгаараа айлын том хүү гүйцэтгэх засаглалын тэргүүнтэй нарсанд суугаа аавынхаа асуудлаар шивнээ хийж явааг үгүйсгэх аргагүй юм. Ингэж хэлэх үндэслэл ч бий.

Зүй нь Ерөнхийлөгчийн сонгуулийн анир цуурайтаж, улс төрийн хүчнүүд аль хэдийнэ хөдөлгөөнд ороод эхэлсэн билээ. Тэр дундаа 10-аад замаар салаалж одсон угшил арвинтай “бяцхан” олонхичуудын дотоод дахь зөрчилдөөн нь сүүлийн үед хүчтэй сэдрэх болсныг хэн хүнгүй л хэлж байна. Янз нь Н.Алтанхуягийн ухаан сийлж, хоёр гараараа байгуулсан “Алтангадас” фракцынхан нь түүний эсрэг тэрслэх болсон юм байх.

Тэр ч бүү хэл намын даргын суудлаас нь огцруулахаар хор найруулж эхэлсэн нь эрхэм сайдтанд өдгөө хамтран ажиллаж байгаа эвслийн эд эс болсон эксийн жигүүрийг бараадах шалтгаан болсон дэг. Тэгээд ч түүний хувьд, нам дотроо нөхөд гэхээсээ илүүтэй “дайсан” олонтой хүн. Энэ нь ч Н.Алтанхуягийг улс төрөөс шахахад, Ерөнхий сайдын суудлын төлөөх бусад өрсөлдөгч нам дахь бүлэглэлүүдэд бэлэн хоол гэсэн үг.

Тиймдээ ч улс төрийн хүрээнийхний яриагаар Н.Алтанхуяг сайд эксийн багийнхантай нийлж, суудалдаа үлдэх гарц хайгаад зогсохгүй ардчилсан Ерөнхийлөгчийг намнах төлөвлөгөө боловсруулж эхэлсэн дуулдана. Мэдээж улс төр бол өгөө, авааны бизнес гэдэг. Тэгэхээр Н.Энхбаяр хэдийгээр ялтан болж, торны цаана сууж байгаа ч өдгөө төрийн эрхийг атгаж буй намынхны “гол дүр”-тэй холбоо сүлбээ тогтоох ажиллагааг алсын зайнаас удирдаж эхэлсэн бололтой юм.

Цаашлаад, Хууль зүйн дэд сайд Э.Эрдэнэжамъяангийн албан тушаалдаа үлдэх эсэх нь эргэлзээтэй болж эхэлсэн мэдээтэй. Түүнийг эрх мэдэл, албан тушаалаа урвуулан ашигласан хэргээр Авлигатай тэмцэх газраас хэрэг үүсгэн шалгаж байсан юм. Гэвч хэргийн мөрдөн байцаалтын хугацаа дуусч, тун удахгүй прокурорт шилжих гэж байгаа гэнэ.

Зүй нь тэрбээр намын улаан хамгаалагчийн үүргээ биелүүлж, Монгол Улсын гуравдагч Ерөнхийлөгч Н.Энхбаярын дүү Н.Энхтуяа, “Өргөө” зочид буудлын гэгдэх Б.Хуягт нарыг олон улсын интерполоор эрэн сурвалжилж байхад нь уг ажиллагааг зогсоож өгөхийг хүссэн захидал илгээсэн юм. Харин интерполоос энэхүү захиаг Хууль зүйн дэд сайд бичих ёсгүй, энэ үнэн үү гэдгийг шалгахаар хариу захидал хаягласан нь уг хэрэг ил болсон.

Гэхдээ тухайн үед дэд сайд гуай “хийх ёстой ажлаа гүйцэтгэсэн” маягийн хариулт өгч байсан юмдаг. Гэвч энэхүү асуудал нийгэмд тэгсхийгээд намжсан ч хууль хяналтынхан ийнхүү шалгаж, эцэслэгдэх шатандаа оржээ.
Харин өдгөө эксийн буянаар албан тушаалын үнэр авсан эрээвэр хураавар тус багийнхан энэ мэтчилэн ажилгүй болох нөхцөл үүсч байна. Мөн Эрүүл мэндийн сайд ахаатан ч салбарын асуудлаасаа болж, сүүлийн үед олны шүүмжлэлд өртөх болсон. Тэгэхээр яах аргагүй эксийн мэдээ дамжуулагчид шинэчлэл уриалсан эрхмийн урдуур хойгуур гүйх нь зүйн хэрэг ч юм уу…
О.Сэлэнгэ

Эх сурвалж: “Нийгмийн толь”