Хөвсгөл аймгийн  Мөрөн сумын төв  талбай Хотгойдын шадар ван Чингүнжавын талбайд  2013 оны 01 дүгээр сарын 14 ний өдөр 13 цагаас  иргэд сонгогчдын цуглаан боллоо.  Тус цуглаанд 800 орчим хүн оролцож, идэр есийн хүйтнийг  ажралгүй, дуу хоолойгоо илэрхийлж, үзэл бодлоороо нэгдэн цугласан юм.

2012 оны Орон нутгийн сонгуульд Хөвсгөлчүүд идэвхтэй оролцож, өөрсдийн сонголтоо хийсэн. Аймгийн ИТХ-ын  41 мандатаас Монгол Ардын Нам олонх буюу  23 суудал авсан. Ард иргэдээс сонгогдсон  Аймгийн ИТХ хуулийн дагуу хуралдаж, Аймгийн Засаг даргыг 3 удаа сонгон,  Ерөнхий сайдад уламжилсан боловч, Монгол улсын Ерөнхий сайд тодорхой шалтгаангүйгээр батламжлахаас татгалзаж удаа дараа буцаан хугацаа авч, эцэст нь  Монгол Улсын үндсэн хууль, Монгол улсын засаг захиргаа, нутаг дэвсгэрийн нэгж, түүний удирдлагын тухай хууль, Үндсэн хуулийн цэцийн дүгнэлтийг зөрчин  цөөнх болсон Ардчилсан намаас Аймгийн засаг даргын түр үүрэг гүйцэтгэгч томилсон  захирамж гаргалаа.

Энэхүү захирамжийг эсэргүүцэн иргэд сонгогчид үгээ хэлж, төр засгийн өндөрлөгүүдэд дуу хоолойгоо хүргэхийг зорисон байна.

Тэд

–       Хөвсгөлийн иргэд сонгогчдын сонголтыг үл хүндэтгэж байгаад хамарсаж байна.

–       Ардчилал, шударга ёс алдагдаж байгаад эмзэглэж байна.

–       Үндсэн хууль болон бусад хууль зөрчигдөж байгаад харуусаж байна.

–       Хууль бусаар орон нутгийн удирдлагыг авах гэж улайрч байгаа хэсэг бүлэг хүмүүсийг эсэргүүцэж байна.

–       Сонгох сонгогдох эрхээ хуулийн дагуу эдэлмээр байна.

–       Хуулиа дээдэлье хэмээн уриа лоозон хэлж,   ард иргэдийн төлөөлөл үзэл бодлоо илэрхийллээ.

Цуглаанаас МУ-ын Ерөнхий сайдад  шаардлага хүргүүлэхээр болж  цуглаанд оролцогчид гарын үсгээ зурж баталгаажууллаа. Цуглаанаас иргэдийн дунд “ Хуулиа дээдэлж, сонголтоо хамгаалах” Түр зөвлөл байгуулж, энэхүү тэмцлээ үргэлжлүүлэхээ илэрхийлэн, Ерөнхий сайдаас хариу иртэл  Чингүнжавын талбай дээр гэр барьж, улс төрийн суулт хийхээр боллоо.