Саяхан үндэсний бөхийн өмнөө барьдаг хэдэн аварга маань Монгол бөхийн найраа энээ тэрээг цэгцлэх цаг болжээ гэж ирээд л баахан зүйл ярьж байгаа харагдсан. Үнэхээр ч үндэсний бөхийн найраа гэдэг зүйл хэрээс хэтрээд байгаа болохоор тэдний ярьж байгаа зүйлийг хоёр гараа өргөн дэмжихээс аргагүй. Гэхдээ залуу аваргуудын зарим нэг нь хэтэрхий үнэнээс хазайсан зүйл ярьж хэлж байгаад ахмадууд нь сонсож тэвчихгүй байгаа бололтой юм аа.

Ямартай л Монголын үндэсний бөхийн холбооны дэд тэргүүн, Монгол Улсын соёлын гавьяат зүтгэлтэн, физик-математикийн ухааны доктор Д.Данзан аварга Д.Сумъяабазарт олны дотор үгээ цэгнэхийг сануулах вэ дээ. “Би гэдэг хүн 30 гаруй ном бичиж хэвлүүлсний дотор дан бөхийн сэдвээр бичсэн долоон ном бий. Бусад нөхдийнхөө 30 шахам номыг редакторложээ.

Номондоо бусад зохиогчдын адил монгол бөх, бөхчүүдийг магтсан байхаас гадна тэднийгээ хайрлах, хамгаалах сэтгэлээр ёс зүй, жудаг чанар, архи тамхи, допингийн тухай илүүтэй бичсэн билээ. Монголд цор ганц байдаг “Бөх” гэдэг тэр найраглалыг ах нь бичсэн юм. Бөхчүүд цээжлээд уншиж явдаг юм билээ.

Түүнд аавын чинь нэр бий. Миний дүү үг яриагаа жаахан бодолтой, хэнд юу хэлж буйгаа ойлгох хэрэгтэй шүү” хэмээн анхааруулан сургасан байна билээ. Уг нь ч “Ахмадын сургаал алт” гэсэн мэргэн үг бий шүү, Аваргаа.
Эх сурвалж: “Улаанбаатар Таймс”