Хүний эрх зөрчсөн бас нэг ноцтой мэдээлэл.

Өнгөрсөн баасан гаригт золгүй тохиолдлоор амиа алдсан эмэгтэйн цогцсыг Сүхбаатар дүүргийн II хорооны цагдаагийн алба хаагчид хэргийн газраас авч явснаас хойш бүтэн хоёр хоног өнгөрсөн ч ар гэрийнхэнд нь мэдэгдэлгүй таг мартаж орхисон хэрэг гарчээ. Талийгаачийн ар гэрийнхний өгүүлснээр талийгаач энэ сарын 6-ны 21:30 цагийн үед Шарга морьтын эцэст амьдардаг найзындаа хонохоор гэрээсээ гарсан аж.

Гэтэл хоёр хоногийн дараа буюу ням гаригийн үдэд талийгаачтай хамт байсан эмэгтэй гэрт нь ирж “Ээж чинь бурхан болсон байна” гэсэн харуусалтай мэдээг дуулгажээ. Сандарч гайхсан хохирогч эмэгтэйн ар гэрийнхэн тус Цагдаагийн хэлтэст очиж юу болсон талаар тодруулахад цагдаагийн алба хаагчидтай уулзах гэтэл энэ хэргийн анхны мэдүүлгийг авсан гэх мөрдөн байцаагч, цагдаагийн ахлах дэслэгч Даваацэрэн “Амарч байна.

Маргааш ажлын өдөр Цагдаагийн хэлтэс дээр ирж уулз” гэсэн хариуг утсаар өгчээ. Ээжийгээ алдсан хоёр охин, ханиа алдсан эр нөхөр, эгчээ, дүүгээ алдсан ах дүүсийн сэтгэлд ажилдаа хайнга хандсан мөрдөн байцаагчийн энэ үг цочролд оруулсан нь мэдээж. Иймээс үр хүүхдүүд нь яг юу болсон талаар мэдэхээр Шүүх эмнэлгийн жижүүр эмчтэй уулзаж, учир байдлаа хэлснээр талийгаачийн цогцсыг харсан байна.

Харамсалтай нь талийгаачийн цогцост аль хэдийнэ задлан хийсэн байсан бөгөөд гэнэтийн энэ үйл явдлыг харсан ар гэрийнхэн нь шоконд орж яахаа ч мэдэхгүй болсон гэнэ. Гэвч нэгэнт өнгөрснийг нь нүдээр харсан тул буян номынх нь ажлыг хийхээр “Улаанбаатар буян” компанийг зорьжээ. Энэ бол талийгаачийг өнгөрснөөс хойш гурав хоногийн дараа болсон үйл явдал.

Тэд талийгаачийн “Алтан сав”-ыг нээлгэхээр “Улаанбаатар буян” компанийн зурхайч ламд хандсан байна Гэтэл нас барсан цаг минут нь шаардлагатай гэсэн тул “амарч байна” хэмээн томорсон байцаагч руу утас цохиход хүрсэн аж. Гэтэл тэрбээр төвөгшөөсөн янзтай “Би мэдэхгүй, 103-ын эмч анх дуудлагаар очсон, Яаралтай түргэн тусламжаас асуу. Тэгээд ч би хэргийн газарт үзлэг хийгээгүй” гээд утсаа салгасан байна.

Харин Яаралтай түргэн тусламжийн төвийн жижүүр, “Баасан гаригийн өглөө дуудлагаар очсон эмч нь одоогоор эзгүй, дуудлаганд явсан. Гар утас нь энд цэнэглээтэй байна. Холбоо барих боломжгүй. Та нар хоёр цагийн дараа ир” гэжээ. Үнэндээ бол нийслэл хотын хэмжээнд ганц байдаг Яаралтай түргэн тусламжийн төв дуудлагын эмчтэйгээ холбоо барих боломжгүй, ядаж богино долгионы хэрэгсэл байхгүй нь тун хачирхалтай.

Үйл явдал үүгээр дуусаагүй аж. “Ард түмнийхээ амар тайван, аюулгүй амьдралын төлөө” хэмээн уриалж төрийн сүлдэндээ тангараг өргөсөн эрхэм цагдаагийн амралтын өдрийг дуусгаж ажилдаа ирэхийг нь хүлээн нойргүй хоносон ар гэрийнхэн нь /өнгөрсөн/ даваа гаригийн өглөө Дамбадаржаагийн эцэст байрлах Цагдаагийн хэл­тэст очсон байна.

Уг нь тэд бурхан болоочийнхоо ямар байдалтай байсан, хаанаас олдсон, хэргийн газарт юу болсон, ямар хүмүүс байсан талаар мэдээлэл авахыг хүссэн аж. Гэтэл Цагдаагийн хэлтсийн хаалгаар оронгуут шатных нь хажууд талийгаачийн өмсч явсан гадуур хувцас болон гутал, цүнх зэрэг эд зүйлс нь хэвтэж байжээ. Тэр ч бүү хэл тэнд байсан цагдаа хажуудаа байсан эмэгтэй цагдаад “Наадах чинь “чад”-ын хувцас” гээд хөлөөрөө замаасаа холдуулж, хажуугаар нь гараад явсан байна.

Хохирогчид яах учраа олохгүй балмагдаж, цагдаагаас “Хувцаснуудыг нь авмаар байна” гэтэл “Байцаагчтайгаа эхлээд уулзчих. Зөвшөөрөл өгвөл авч болно” гэсэн байна. Үнэндээ бол цагдаа ч гэсэн хүн. Тэд төрийн төлөө, ард түмнийхээ төлөө ажилладаг. Хэдийгээр тэд бидэнд тоног төхөөрөмж, буу зэвсэг гээд юм юм дутагддаг хэмээн ярьдаг ч хүний мөс, хүн чанар гэдэг зүйл юу юунаас илүү байх учиртай.

Харин тэдэнд тийм зүйл байгаагүй. Талийгаачийн хувцсыг ядаж “зуугийн тор” ч болтугай олоод хийчихээгүйд маш их гомдож байсан. Хоёр хоногийн өмнө угааж өмсөөд гарсан ээжийнх нь гадуур хүрмийг “чад”-ын хувцас гээд нохойн хэвтэр шиг хөсөр хэвтэхийг харсан үрийн сэтгэл ямар байх вэ? Ээжийгээ, эгчийгээ, ханиа цаг бусаар алдсанаа мэдэлгүй бүтэн хоёр шөнө гурван өдрийг нойргүй хонож улмаар энэ ертөнцөөс явсныг нь мэдээд яах учраа олохгүй балмагдсан хүмүүсийг “Ажлын өдөр ир” гэж дахин нэг шөнө хүлээлгэсэн байцаагчийг юу гэж ойлгох вэ.

Үнэндээ цагдаагийн ахлах дэслэгч Даваацэрэнд талийгаачийн цүнхэнд байсан “иргэний үнэмлэх”-ийг нь, бичиг баримтыг нь харах зав байсангүй гэж үү. Уг нь тэр харсан байх учиртай. Харамсалтай нь түүнд гэрийнх нь хаягаар очоод хүний ёсоор хэлчих хүн чанар дутаж. Магадгүй тэрбээр талийгаачийг олох үед согтууруулах ундаа хэрэглэсэн байсан хэмээн тоомжиргүй хандсан байж болох.

Эцэст нь, энэ бүх асуултын хариуг талийгаачийн нөхөр, үр хүүхэд, ар гэрийнхэн түүнээс асууж тэр үүнд нь хариулна хэмээн найдаж байна. Бас уучлалт гуйгаасай хэмээн хүсч байна. Яагаад гэвэл цагдаагийн байгууллагынхан иргэдээсээ уучлалт гуйдаг болсон тухай сүүлийн үед хэвлэлээр гарах болсон. Хэрэв энэ нь цагдаа шинэчлэгдсэн хэмээн үзүүлэхийн төлөө хийж буй шоу биш бол ээжийгээ, эгчээ, ханиа алдсан энэ хүмүүсээс цагдаа нар уучлалт гуйгаасай.

Б.Сайн

Эх сурвалж: “Өдрийн Шуудан”