Шинэчлэлийн Засгийн газрын сайд нар салбар бүртээ өөр өөрсдийн эрх ашигтай, томилогдсон нь одоо ил болж байна. Засгийн эрхээр дамжуулан бизнесийн замаа засч, ашиг сонирхлоо амархан гүйцэлдүүлэх нь ашдын ирээдүйд хэрэгтэйг аль хэдийнэ амдан хүлээж суусан нь ч цөөнгүй. Аманд орсон шар тосыг хэлээрээ түлхэх гэж тэд албан тушаал аваагүй нь ч мэдээж. Сайдын сэнтий гэдэг одоо цагт санааны зоргоор олдох эд биш. Ашиггүй яамыг сандайлах сонирхол барагтай бизнесмэнд байхгүй.

“Женко” Х.Баттулга жинхэнэ бизнесмэн эр гэдгээ харуулж Үйлдвэр хөдөө аж ахуйн сайдын суудалд өлхөн заларсан. Төмөр зам, аж үйлдвэрийн цогцолбороор том том дуугарч байсан түүнийг тэс өөр яам толгойлох болсонд олон хүн гайхаж байсан. Гэвч тэр бүхний учир одоо эхнээсээ тайлагдаж эхэллээ. Эрх мэдлээр дамжуулж мөнгийг хэрхэн олдогийн үлгэрийг одоо тэрбээр үзүүлж бас гайхшруулж байгааг олон хүмүүс атаархан ярьцгааж байна. Улсын нөөцөд мах бэлтгэх гэх гоё нэртэй их мөнгөний асуудал одоо эд өрнөж, эрхэм сайд ч үүнд холбоотой гэх яриа өвсөнд тавьсан гал адил тархаад байна. Үнэндээ ирэх оны улсын нөөцөд бэлтгэх 16 мянган тонн махны үнэ 90 орчим тэрбум төгрөгийн асуудалд эрхэм сайдын оролцоо, эзэмшдэг “Мах импекс” компанийн нэр холбогдоод байгаа аж.

Тэрбумаар тоологдох мөнгө, туранхай махны хэл ам ирэх жилд ч эрхэм сайдын чихийг халууцуулах нь ойлгомжтой. Улсын нөөцийн мах бэлтгэх нэрийдлээр хувийн компаниа “мөнгөжүүлсэн” гэх хардлагад өртөөд байгаа Х.Баттулга сайдын асуудлыг хуулийнхан ч анхааралдаа авсан гэх мэдээлэл бий. Хэрвээ энэ бүхэн үнэн бол улсын нөөцийн мах бэлтгэхээр олон тэрбумын хөрөнгөөс хамтдаа хуваалцсан компаниуд ч хүндхэн байдалд орох нь мэдээж.

Эх сурвалж www.wikimon.mn