УИХ дахь «Шударга ёс» бүлгийн тэргүүний албаа УИХ-ын гишүүн, Сангийн сайд Ч.Улаанд хүлээлгэж өгсөн. Өөрийн хүсэлтээр гэх боловч бас л нэг төрлийн «татгалзах аргагүй санал» хүлээн авсан гэх бор шувуу нисээд өнгөрсөн. Уриалгахан, хүүхдэрхүү зантай түүнийг сүүлийн үед хэлсэн үгээр нь дөрөөлөн ах, эгчийн намбаар дарамтлах хүн олширчээ. Эзэн Чингис хаанаа «нар хиртдэг өдөр төрүүлэхгүй» гэж хэлээд УИХ-ын гишүүн Ц.Оюунгэрэлд «нар, сарны хөдөлгөөн»-ий талаар баахан дүрэмдүүлээд авч харагдсан.

Харин өчигдөрхөн УИХ-ын Төрийн бодлогын байнгын хорооны хуралдаан дээр «Арваннэгдүгээр сарын 26-нд бүх нийтээрээ амардаг байсныг болиулж байгаа нь буруу» гэж хэлээд Н.Батбаяр гишүүнээс егөөтэй хэрнээ «гашуухан» зэмлэл сонсоод авсан.

«Чингис хааны хөрөгтэй танхимд сууж байж юу гээд олон юм яриад байгаа юм» гэсэн зэмлэл сонссон О.Баасанхүү гишүүн тэрүүхэн тэндээ мушиймар болж суусан ч «Улстөр ч хатуухан тоглоом юм даа. Олноороо түрээ барьж, Чингис хааны төрсөн өдрийг арваннэгдүгээр сарын 14-нд хийх гээд байгаа юм бол ард түмэн, сонгогч олон маань хоёр өдөр яагаад амарч болдоггүй юм» хэмээн бодож суусан байх даа. За яах вэ. О.Баасанхүү гишүүн ээ. Эр өсч эсгий сунах өдөр ирэх л байлгүй дээ.