МАХН-ын 500 гаруй гишүүн, дэмжигчид өчигдөр клиникийн хоёрдугаар эмнэлэгт очиж Н.Энхбаяр даргыгаа “эргэлээ”.

Эмнэлгийн зүгээс “Өвчтөн Н.Энхбаярын биеийн байдал сайнгүй байгаа. Хүн оруулахгүй боломжгүй” гэснээр гишүүд нь эмнэлгийн гаднаас түүнтэй мэндэлсэн юм. Тэд МАХН-МҮАН-ын “Шударга ёс” эвслийн “Ард түмний их хуралдайд 21 аймгийн зон олныг төлөөлөн ирж оролцсон төлөөлөгчид юм. Цугласан олны дунд МАХН-ын дэд дарга, Шадар сайд Д.Тэрбишдагва, УИХ-ын гишүүн О.Баасанхүү, МАХН-ын Ерөнхий нарийн бичгийн дарга Г.Шийлэгдамба, тус намын нарийн бичгийн дарга У.Барсболд нар байв. Энэ үеэр дэмжигчид нэгэн дуугаар “Шударга үнэн гэж байдаг бол Н.Энхбаяр ялна аа. Та ганцаараа биш шүү. Таны ард монголчууд бүгдээрээ байгаа. Сэтгэлийн зоригтой байгаарай” гэхчилэн захиас хэлж байлаа. Зарим дэмжигч гишүүдийг байр суурийг сонирхлоо.
Иргэн Н.Туяа “Улс төрийн зорилгоор Н.Энхбаяр даргыг ялласан гэдэгтэй санал нэг хүний нэг нь би. Хэдийгээр улс төрийн захиалгаар яллах туйлын сонирхол байгаа ч Улсын дээд шүүхийнхэн үүнийг засч залруулах байх. Н.Энхбаяр даргыг харахад биеийнх нь байдал сайнгүй харагдаж байна лээ. Цонхийгоод нүднээс гарчээ. Арга ч үгүй биз дээ. Өөрийнх хийсэн бүтээснийг нь үгүйсгээд хилсээр ял ногдуулахад сэтгэлд нь маш том дарамт болсон байх” гэв.
Иргэн Х.Батбаатар “Монголын ард түмний найдвар Улсын дээд шүүхээс хамаарч байна. Хэргийн үнэн мөнийг дээд шүүх тогтооно гэдэгт итгэж байгаа. Анхан шатны шүүх хуралдааныг зурагтаар харахад түүнийг буруутгах ямар ч нотлох харагдаагүй шүү дээ. МАХН-ын дэмжигч гишүүд л зөвхөн хууль,шүүхийн байгууллагыг бусдын захиалгаар ажилладаг гэж шүүмжилж байсан нь саяхан. Тэгвэл МАН-ынхан хүртэл үүнийг хүлээн зөвшөөрч бидэнтэй санал нэгтэй байгаад баярлаж байгаа шүү” гэсэн юм.

www.times.mn