Үйлдвэр Худалдааны яамны төрийн нарийн бичгийн дарга байхдаа төрийн мөнгийг үрэн таран хийсэн хэргээр шүүхээс ял аван хоригдож байсан Д.Сүрэнхор суллагдаад нэлээд хугацааг үджээ. Тэрээр төрийн өндөр албанд томилогдож тухлах даа удаа дараа төрийн мөнгөөр тоглон алдаж байсан удаатай. Мань хүн сүүлдээ ажилчдынхаа цалинг ч мөрийнд тавиад алдаж байсан гэдэг.

Мэдээж хэрэг, төрийн мөнгөөр тоглоно гэдэг нь ачиртаа иргэд та бидний татвар хэмээн тушааж байсан хэдэн төгрөг юм шүү дээ. Буруу үйл хийсэн бол хэзээ нэгэн цагт илэрдэг хойно түүний эл үйлдэл хэрээс хэтэрч хууль хяналтынхны овоо хараанд өртөх болсон. Д.Сүрэнхор ял аваад удаагүй байтал түүний эхнэр болох Эрдэнэ-Отгон нь согтууруулах ундаа хэтрүүлэн хэрэглэсэн үедээ машин барьж яваад бусдыг дайрч гэмтээн хүний аминд хүрсэн.

Эл хэрэг хоёр жилийн өмнө Баянгол дүүргийн I хороо буюу Улаанбаатар Төмөр замын гал командын байгууламжийн зүүн талын Нарны зам дээр УНН 70-20 маркийн “Тоёота витз” маркийн автомашинаар үйлдэгдэж байлаа. Хэрэг явдал ч ямар хуучрах биш. Удтал хууль шүүхийнхэнд шалгагдаж байсан Эрдэнэ-Отгон сүүлдээ хэрэг үйлдээгүй болж хоцров.

Тэрээр согтууруулах ундаа хэрэглэсэн үедээ хүн дайрч аминд хүрчихээд хохирогчийг 750 метр газар чирсэн байдаг. Хэргийг Замын цагдаагийн Эрүүгийн тасгаас шалгаж, Тээврийн прокурорын газарт шилжүүлсэн ч прокурорын даалгавраар нэмэлт ажиллагаа явуулах гэсэн дүгнэлтээр удаа дараа буцаж байлаа. Хэргийн газраас зугтсан хүний аминд хүрсэн Д.Эрдэнэ-Отгоны хэрэг сүүлдээ ч мянгуужингын үлгэр болж хэрэгсэхгүйгээр шийдвэрлэгдсэн байна.