Шатрын нүүдэл аятай үзэгдлүүд ээлж дараалан харагдаж, шархаа нөхөхөөр яарагсад мөнгөөр авсан албан тушаалаа өөрт ашигтайгаар эргүүлж эхлэх үү? гэсэн хардлага шинэчлэлийн Засгийн газрын тийш онилогдлоо. Энэ ч аргагүй юм. Сонгуульд зарцуулсан мөнгөө хэд дахин нугалж олдог нь Их хурал хийгээд Засгийн газрын гишүүн болсны ганц хэрэг зорилго хоёр билээ. Нэг тэрбум төгрөг хаяж байж Эрчим хүчний сайдаар томилогдсон “Шударга ёс” эвслийн төлөөлөл болох М.Сономпил ажлаасаа ашиг гаргах завшааныг завсар чөлөөгүй хайж байгааг эх сурвалжууд хэлж байна. Тэрбээр яамны бүх ажилчдын цалинг нэгэн нэр бүхий банкаар хүчээр авахуулах шийдвэр гаргаж санхүүгийн сонголтыг нь боогдуулж байгаа агаад тус салбарт хэрэгжиж байгаа 10 орчим төсөл хөтөлбөрүүдийг өөрийн хувийн компани болох “Залуу Монгол” группын байранд түрээс төлж байрлахыг хүчээр тулган шаардаж байгааг нь “Дэндүү нэрийн хор болсон ядмаг үйлдэл болж байна” гэж хөгшин залуугүй жигшиж байгаа гэнэ.

Эрчим хүчний ийм том салбар гарт нь байхад иймхэн юм хөөцөлдөж нэр хүндээ унагах шаардлага байдаг ч юм уу? Үгүй ч юм уу бүү мэд.  Сонгуульд зарцуулсан мөнгөө түрээсийн хэдэн төгрөгөөр нөхнө гэж бодоогүй л байлтай.  Дээрх үйлдлүүд нь Засгийн газарт хамтран зүтгэгч Хууль зүйн сайд Х.Тэмүүжингийн шинэчлэл хийх үйл хэргийн нэг хэсэг болох Ашиг сонирхлын зөрчлийг арилгах асуудалд хэр нийцтэй байгааг эрхэм сайд маань анхаарах эсэх нь одоо сонирхолтой байна. Мөн Ерөнхий сайд Н. Алтанхуяг ч гэсэн шинээр бүрдүүлсэн ЗГ-ын нэр хүндэд хэрхэн сөргөөр нөлөөлж байгаа талаар анхаарал хандуулаасай хэмээн АН-д найдсан урмаа хугалуулсан олон хүн хүлээж байгааг баттай эх сурвалж мэдээлж байна. Өөд болж тэнгэрийн оронд очсон ахынхан эхнэр хүүхдийг гэрээс нь хөөж, эзэмшиж байсан хувийн бизнесийг нь булаан авч хөл дээрээ тогтсон гэх М.Сономпилд ах дүүс, ураг садан ч нөлөөлөгүйг нь харвал хүн чанараар тун тааруухан, хөлжиж баяжихад хэнийг ч зольж мэдэх шуналтай нэгэн гээд нэрлэчихэд хэтийдсэн болохгүй биз ээ. Ямартаа ч яаран сандран хийж байгаа түүний ажлаас сар хүрэхгүй хугацаанд ноцтой үйлдлүүд ийнхүү эхнээсээ илэрч салбарын ажилчдын дургүйг хүргээд байна. Мэдээж суудалдаа бат бөх сууж чадвал сайд болоход хаясан нэг тэрбумаа сайтар ахиулахаар хэтэрхий улайрсан М.Сономпилийг ард түмэн харж байгаа гэдгийг бүү мартаасай!

Эх сурвалж www.wikimon.mn