Сүүлийн үед хэвлэл мэдээллийн хэрэгслээр “МАН-ын Ерөнхий нарийн бичгийн дарга Г.Занданшатар Н.Энхбаяртай уулзах хүсэлт тавьжээ”, “МАН-ын дарга Ө.Энхтүвшин Н.Энхбаярыг эргэж очиж гэнэ” гэх мэдээлэл их гарах болсон.

Харин өчигдөр, уржигдархнаас “АН-ын дарга, Ерөнхий сайд Н.Алтанхуяг Н.Энхбаяртай уулзана” гэх мэдээлэл гарах боллоо. Энэ харваас МАХН-аас өгсөн мэдээлэл гэдэг нь “уншигдаж” байна.

За яах вэ, ялагдсан намын дарга нар Н.Энхбаяртай очиж уулзах нь байх л асуудал. Нэр дээрээ хоёр хуваагдсан MAH, МАХН гэгдэж байгаа ч нидэр дээрээ тэд нэг л угшилтай улс. Харин Засгийн газрын тэргүүн, АН-ын дарга Н.Алтанхуяг Н.Энхбаяртай очиж уулзана гэхээр сонирхол төрөөд байх юм. Ардчилсан нам сонгуульд ялмагцаа Н.Энхбаярын байгуулсан “Шударга ёс” эвсэлтэй хамтарч Засгийн газар байгуулна гэж хэлсэн.

Хэлсэн амандаа ч хүрсэн. Үүнийг нь бодохоор хамтарч Засгийн газар байгуулсан хоёр намын удирдлага уулзахад гайхах зүйл алга. Гэхдээ л хачирхалтай байна. Н.Энхбаярын хувь заяа ардчилсан засгийн үед эргэдгийн дээдээр эргэсэн. Н.Энхбаяр УИХ-ын сонгуульд нэр дэвшиж чадаагүй. Хууль хяналтынхан түүний эсрэг байж, түүнийг дөрвөн жил хорихын хүйтэн өрөөнд хорихоор шийдсэн.

Эрүүл мэнд нь муу байна гэхэд түүнийг ардчиллынхан тоогоогүй. Түүгээр ч үл барам ирэх жил болох Ерөнхийлөгчийн сонгуульд өрсөлдөх эрхгүй болсон. Ингэхээр энэ хүн засгийн үед цовдлуулсан нэгэн юм. Гэтэл ардчилсан Засгийн газрын тэргүүн жирийн нэг хорихын эмнэлэгт хэвтэж байгаа Н.Энхбаярыг зорьж очих болсныг гайхахгүй өнгөрч болно гэж үү. Тэр Н.Энхбаяраас “Эвслээ битгий задлаач” гэж гуйх гээд байгаа бололтой.

“Шударга ёс” эвсэл тэртэй тэргүй хэд хэд задарчихаад байна. Энэ орон нутгийн сонгуульд МАХН- МҮАН-ын “Шударга ёс” эвсэл зарим газар хамтарч, заримд нь тус тусдаа, бүр нэг хэсэгт нь ИЗНН-тай хамтарч “Иргэний шударга ёс” эвсэл байгуулж оролцож байгаа. Түүгээр ч зогсохгүй гишүүд нь намаа сольж, хоёр намаа нэгтгэнэ, салгана дээрээ тулчихаад, хөнжилдөө хөлөө жийлцэж байна.

Яг энэ байдал л ардчилсан засгийн тэргүүнийг айлгав бололтой. Хэрвээ “Шударга ёс” эвсэл задарвал Засгийн газар огцрох нь тодорхой. Тэгэхээр Н.Алтанхуяг “Аргаа барсан хүүхэд аавынхаа толгойг маажна” гэгч болж байх шиг байна. Тэгээгүйсэн бол тэр юу боллоо гэж хоригдож байгаа хүн рүү гүйх билээ. Хувь заяа нь дээсэн дөрөөн дээр дэнжигнэх болсон Засгийн газрын Ерөнхий сайд эцэстээ эвслийн тэргүүн Н.Энхбаяраас аврал гуйх гэж байгаа нь энэ аж.

Бүр анхнаасаа л энэ Засгийн газрын хувь заяа Н.Энхбаярын гарт байсан. Одоо ч байгаа. Тэгэхээр Н.Энхбаяр гэдэг хүн Есүс Христ болчихоо юу даа гэж л харагдаад байна. Харин эвслийн тэргүүн Н.Энхбаяр, Ерөнхий сайд Н.Алтанхуягт юу гэж хариулах бол.
Н.Будсүрэн
Эх сурвалж: “Улаанбаатар Таймс”