Монголын улс төрийн амьдрал үймээн самуун ихтэй байгаа шиг улс төрчдийн амьдрал ч бас хөл хөдөлгөөн ихтэй байна.

Шинэчлэлийн Засгийн газар байгуулж, төсөв мөнгөө батлуулах гээд завгүй суугаа Н.Алтанхуяг Ерөнхий сайдын эхнэр Х.Сэлэнгээ хэмээх даруухан бүсгүй бий. Х.Сэлэнгэ нь Н.Алтанхуяг даргын хоёр дахь эхнэр. Гэсэн хэдий ч тэрээр хуучин эхнэр Ганчимэгтэй эвтэй найртай байж, хүүхдүүдийнхээ төлөө санаа тавьдаг хамгийн үлгэр жишээ ээж гэдэг юм билээ. Хэдийгээр нөхрөөсөө олон насаар дүү ч эрх танхи загнаж дээгүүр дэвээгүй. Нөхрийнхөө ар талыг сайн манаж, өнөөдрийн амжилтад хүргэсэн гэж үнэлэгддэг энэ эмэгтэй ханийгаа “хайртушка” хэмээн дууддаг гэнэ лээ. Н.Алтанхуяг даргад гурван охин төрүүлж өгсөн Х.Сэлэнгэ бүсгүй хөл хүнд болж, удахгүй нярайлах гэж байгаа гэдэг мэдээлэл саарал ордон дотор хэсүүчилж явна. Н.Алтанхуяг дарга 54 насандаа дахин үрийн зулай үнэрлэх гэж байгаа нь энэ. Х.Сэлэнгээ бүсгүй ихэвчлэн “Хаан жимс” амралтын газарт байрлаж, цэвэр агаарт амарч байгаа сурагтай. Тэгвэл МАН-ын зартай дарга нарын нэг экс Ерөнхий сайд С.Баяр ч бас шинэ амьдралаа төвхнүүлээд байгаа гэнэ. Түүний анхны эхнэрийг О.Гэрэлтуяа, дараах эхнэрийг Х.Хулан гэдэг. Удаах эхнэрээ УИХ-аас сонгож байсан С.Баярын хоёр дахь амьдрал бүтэлгүйтсэнээс хойш гоонь эрийн амьдралыг сонгож багагүй хугацаагаар ганцаараа амьдарсан. Элэгний хүнд өвчтэй, бас байнгын асаргаа сувилгаа хийлгэх шаардлагатай С.Баярт энэ удаа тун халамжтай бүсгүй таарсан гэж түүний ойр дотных нь хүмүүс ярьж байна.  С.Баярын залуу гэргий Ариунсувд хөл хүнд болж, хосууд шинэ хүнээ Америкт хүлээж байгаа гэдэг мэдээлэл тараад удаж байна. Ерөнхий сайд асан С.Баяр 1956 онд төрсөн. Өдгөө 56 насныхаа босгон дээр бас л хэнз үрийнхээ зулайг үнэрлэхээр хүлээж байна. Ерөнхий сайд асан С.Баяр дөрвөн охинтой. Тэрбээр том охиноосоо төрсөн хүү Нацагийг үрчлэн авч өөрөөрөө овоглох болсон. Тиймээс энэ удаа экс Ерөнхий сайд С.Баярын залуухан эхнэрээс хүү төрөөсэй гэж олон хүн хүсэн хүлээж байна.

shudarga.mn