Сүүлийн үед Маяачуудын тооллын нэгэн цикль буюу тоолол дуусч байгаатай холбоотойгоор 2012 оны арванхоёрдугаар сарын 21-нд дэлхий сөнөнө. Гурван шөнө харанхуй болж, 70-80 хэм хүрч хүйтэрч хүн төрөлхтөний уушиг хөлдөнө. Наран дээр дэлбэрэлт болно гэх мэт мэдээлэл монгол төдийгүй дэлхий нийтэд тархаад байгаа. Энэхүү цуурхалд “Монголын бөөгийн холбоо”, “Манукол” академийн ерөнхийлөгч, физикч, философич, доктор З.Бат-Отгон нар өөр өөрийн байр сууриа илэрхийлж байгаа билээ.

Харин энэ удаа “Орифлейм”-ийн Г.Оюунгэрэлтэй холбогдож, “Бумбын эрин”-ий талаар сонирхлоо.

-Сайн байна уу. Мэдээ.мн сайтаас ярьж байна. Та сүүлийн үед “Бумбын эрин ирнэ” гэж ярих болжээ. Энэ талаар яриа өрнүүлмээр байна?

-Би UBS телевизийн “Цай юу, кофе юу?” нэвтрүүлгээр орсон. Бумбын эриний шилжилтийн тухай яриад сэтгэл их зовсон байсан учраас соронзон туйлын өөрчлөлттэй холбоотой асуудлаар ярьсан. Түүнээс хойш нийгэмд нэлээд чимээ шуугиантай л байна. Хүн бүр өөрийнхөө үзэл бодол, ойлголт, мэдлэг, сэтгэлийн хэмжээнд л хүлээж авсан байна лээ. Одоо би тайван баймаар байна.

-Та “2012 оны 12 сарын 21-нд дэлхий сүйрнэ” гэж ярьж байсан. Энэ талаар эрдэмтэн судлаачидтай уулзаж санаа оноогоо солилцсон уу?

-Мэдээж санаа оноогоо хуваалцалгүй яахав. Зарим нь ойлгож байхад, зарим нь Аргогийн араас орсон шизотой авгай гэж бодоод байх шиг байна. Тэр өдөр хэн нь үнэн хэлсэн, хэн нь худал хэлснийг тунгаагаад өгөх биз ээ. Би 1984 онд Ломоносовын их сургуулийг химич мэргэжлээр төгссөн. Суралцаж байхдаа физик, квант физик, хими, байгалийн шинжлэх ухааныг маш сайн судалсан л даа. Одоо би Үндэсний аюулгүй байдлын зөвлөлийн гишүүдтэй байна. Бурхан надад агуу их хишиг, авшиг буянаа хайрласан ч нийгмийнхээ хувьд хүлээн зөвшөөрөгддөггүй, есөн шидээр доромжлуулдаг хүн болсноо ойлгож, өөрөө л уншиж судлаад л, өөрийнхөөрөө тунгаагаад л, ганцаардалдаа дасан зохицож амьдрах болсон. Энэ амьдрал бол хувь хүний хувьд нэг их хүсэх зүйл биш юм даа. Далд хүчний чадвараа олон жил нууцалсан.

-Чухам “Бумбын эрин” гэж юу юм бэ?

-Бумбын эрин бол оюун ухааныг дээдлэн, шим тэжээл өгөхийн зэрэгцээ, эвсэн зохицох, өвчин зовлон, уур бухимддаас ангижрах, оюун ухаанаа төгс хөгжүүлэн хүсэл мөрөөдлөө биелүүлэхэд туслах хийгээд бүхнийг номын гэрлээр ариусгах эрин гэж ойлгож болно. Энэ эринийг хүн төрөлхтөн 26 мянган жил хүлээсэн. Хуучнаар бол коммунизм, дутагдаж гачигдахын зовлонгүй, дайн тулаангүй, өшөө хорсолгүй, өвчингүй, атаа жөтөө, атгаг санаагүй хүмүүсийн аз жаргал, хайрын эрин гэж олон эрдэмтэд тодорхойлсон байдаг юм билээ. Бумбын эринийг бурхан хүмүүсийн эрин зуун гэж байгаа юм. Өөрөөр хэлбэл бодол биелэх эрин. Хүн бодол хүслээ материаллаг болгох чадвартай болх үе. Зарим хэвлэлүүд миний яриаг хэтэрхий гуйвуулж, дэлхий сөнөх юм шиг юм бичээд байх юм.

–Хэзээ энэ эрин рүү шилжих вэ?

-Ертөнцийн жамын дагуу хүн төрөлхтөн 2012 оны 12 дугаар сарын 21-нд Алтан бумбын эрин рүү шилжинэ. 1999 оны 08 дугаар сарын 11-нд Бумбын эрин рүү шилжих нэлээн огцом шилжилт хийгдсэн гэж үздэг. Энэ өдөр нар хиртсэн. Дэлхий өөрийн энергиэ тэглэсэн. Тэгээд дэлхий цоо шинэ дэлхий болж дахин төржээ. Дэлхий энергигүй болохоор амьд бүхэн бөхнө гэж эрдэмтэд айж байтал нар хиртэлтийн дараа дэлхий өөрөө дахиж эргэлтэд орсон. 1999 оны 08 дугаар сарын 11-нээс хойш төрсөн хүүхдүүд бүгд индиго хүүхдүүд. Тэд зургаа дахь соёл иргэншлийн буюу Алтан бумбын эриний  иргэд гэж үзэж байгаа юм. 12 дугаар сарын 21-нд ямар үйл явц болох вэ гэхээр бүх од гаригс нэг шугам дээр жагсах юм. Нарны аймгийн бүх од эрхсийн төдийгүй Ертөнцийн бүх гариг, эрхсийн жагсаал гэж нэрлээд байгаа.

–Тэр өдөр дэлхийд соронзон орны өөрчлөлт болно гэсэн үг үү?

-Далай тэнгисийн ус 90 хэм босч ирээд хуурай газар руу асгарна. Япон, Гонконг, Сингапур алга болно. Европт л гээд байгаа юм, их хүйтэн мөсөн тив үүснэ. 80 цаг харанхуй нөмөрнө. Цахилгаан, холбоо, гар утас, тээвэр юу ч ажиллахгүй. Соронзон туйл өөрчлөгдөхөөр наадуул чинь ажиллахгүй.

–Пөөх, 80 өдөр нар гарахгүй байхаар дэлхий сүйрнэ биз дээ?

-Дэлхий сөнөхгүй ч дэлхийн шинэ эзэд нь монголчууд байх болно. Дэлхийн бүх хүмүүсийг монголчууд бид захирч, Тэнгэрийн эзэнт гүрнийг байгуулах сайхан цагийг хүлээсэн. Одоо тэр сайхан юмаа нүдээрээ харах цаг ирлээ. Гэхдээ монгол гэр монголчуудыг аварна.

-Та яг одоо хаана байна вэ. Хэзээнээс монгол гэрт амьдарч байна?

-Эгч нь яг одоо Дорноговь аймагт амралтын журмаар ирчихээд байж байна. Миний аав Монгол улсад төрсөн хамгийн сүүлд жанч халсан Говийн шаврон хутагт Гомбосүрэн хувилгаан гэж хүн байсан. Аав, ээж хоёр Дорноговь аймгийн Хөвсгөл сумын харьяат. Би өөрөө хотод төрсөн. Монгол гэрт төрж, өсөөгүй монгол хүн ховор болов уу. Монгол гэр хамгийн аюулгүй, авсаархан сууц. 2012 оны 12 сарын 21-ний үйл явдлаас өмнө гэрээ зэхсэн байгаа.

–Харин Монголчууд энэ өдөр ямар бэлтгэлтэй байх ёстой вэ?

-12 дугаар сарын 21-нд энергийн их өөрчлөлтөнд орно. Монгол түмэн “Сайхан сэтгэлийн үзүүрт тос”, ”Санаа зөв бол заяа зөв”. “Зөв явбал зөөлөн зөөлөн замбуулин” гэдэг. Тэр л цаг үе ирнэ. Сэтгэлгээгээ өөрчилж, зөв хүн болох явдал байгалийн ч, оюуны ч шалгаралд таныг авраад л гарна. Хүнд гомдсон гомдол ДНХ-ийн түвшинд мэдээлэл болж кодлогдоно. Сэтгэлийн шаналал, гутрал, бухимдал, атаа жөтөө, хорон санаа, итгэл алдрах байдал, гомдол, өшөө хорсол эд бүгд сөрөг сэтгэлгээд ордог. Бумбын эриний шилжилт нь оюун санааны шинэ түвшинд шилжих шилжилт юм. Бодол, сэтгэл, үг, үйлдлээ цэгцэлж, зөв хүн байх нь шилжилтийг давах цорын ганц шалгуур гэж шууд ойлгож болно. Уг нь нэг их хэцүү шалгуур биш байгаа биз дээ.

      мэдээ.mn