Их Монгол Улс байгуулагдсаны 806, Ардын хувьсгалын 91 жилийн ойн баяр наадмын дуулиан намдаагүй байна.

Аймгийн цолтон төрүүлж, луу жилтнүүд хийморьтой сайхан барилдаж, шинэ арслан төрсөн энэ наадмын дуулиан шуугианы сүүлийг сэргээш хэрэглэсэн бөхчүүдийн талаар мэдээлэл залгаж эхэллээ. Ардын хувьсгалын 91 жилийн ойн баяр наадамд шөвгөрсөн 16 бөхөөс авсан сэргээшийн шинжилгээний хариу гарч, хоёр бөхийн сорьцоос энэ төрлийн бэлдмэл илэрчээ. Энэхүү дуулианы эздээр Монгол Улсын арслан Х.Мөнхбаатар, Монгол Улсын начин Б.Сугаржаргал нар тодроод байна. Х.Мөнхбаатар арслан Ардын хувьсгалын 91 жилийн ойн баяр наадмаар тавын даваанд улсын начин Ж.Оргилыг, зургаагийн даваанд улсын начин Ж.Амартүвшинг, долоогийн даваанд улсын харцага Т.Санчирыг давсан бол наймын даваанд улсын арслан Д.Рагчаад өвдөг шороодсон билээ.

Харин Б.Сугаржаргалын хувьд дөрвийн даваанд Г.Өсөхбаяр аваргыг хаяад, тавын даваанд Б.Соронзонболдоор Монгол Улсын начны болзол хангасан боловч ийнхүү сэргээш хэрэглэсэн хоёр бөхийн нэгээр тодорлоо. Баяр наадмын тухай хуульд лабораторийн шинжилгээгээр сэргээшийн төрлийн эм, бэлдмэл хэрэглэсэн нь тогтоогдвол давсан давааг нь хүчингүй болгож, тухайн бөхийн цол, чимгийг хураах саналыг Ерөнхийлөгчид өргөн мэдүүлээд барилдах эрхийг нь хоёр жилээр хасах заалт оруулж, баталсан юм. Гэвч өнөөдрийг хүртэлх хугацаанд бөхчүүдээс сэргээш илэрсэн нь тогтоогдсон ч цолыг нь хураасан тохиолдол байгаагүй. Энэ утгаараа Х.Мөнхбаатар, Б.Сугаржаргал нарын цол, чимгийг хураах асуудал ингэсхийгээд дарагдаад өнгөрч магадгүй хэмээн олон хүн ярьж байгаа.

Гэвч Х.Мөнхбаатар арслангийн хувьд энэ шинжилгээний дүнг хүлээн зөвшөөрөхгүй байгаа бөгөөд тэрбээр өөрийнхөө зардлаар Солонгост дахин шинжилгээ хийлгэх хүсэлтээ гаргаад байгаа гэнэ. Шинжилгээ хийлгэх мөнгө 40 орчим сая төгрөг байдаг ч Х.Мөнхбаатар арслан “Би нэр төрөө хамгаалахын тулд үүнээс ч их зүйл гаргах ёстой” хэмээн Үндэсний бөхийн холбооныхонд мэдэгдсэн сурагтай. “Х.Мөнхбаатар арслангийн хувьд хөлний гэмтэлтэй, одоогоос олон жилийн өмнө шөрмөсөө таслаж, Японд хиймэл шөрмөс суулгуулж байсан. Энэ эмчилгээ одоо ч үргэлжилсээр байгаа. Гэмтэл, бэртэлийн дараа хийлгэсэн хагалгаа, үүнд ууж байсан эм, хэрэглэж байсан тарианаас болж ийм дүн гарсан байж болзошгүй” хэмээн найз нөхөд нь ярьж байгаа юм.

Хэзээ ч илүү дутуу асуудалд нэр холбогддоггүй цөөхөн бөхчүүдийн нэг Улсын арслан Х.Мөнхбаатарыг сэргээш хэрэглэсэн гэдэгт бөх сонирхогчид одоо ч итгэж чадахгүй байна. эрбээр Ямартай ч Х.Мөнхбаатар арслангийн шинжилгээний “Б” сорьцыг БНСУ руу илгээжээ. Энэ жилийн улсын их баяр наадамд долоо давсан Арслангийн шинжилгээний хариу ирэхэд тэр заргаа авна гэдэгтээ итгэлтэй байгаа ажээ.

shudarga.mn