“Мисс Монголиа-2010” тэмцээний ялагч Б.Бадамцэцэгийг хүмүүс “Хэцүү анги” киноны Гэрлээгийн дүрээр нь андахгүй мэднэ.

Сэтгэхүйн эмгэнэлт драмын эл жүжгийг үзэхээр ирсэн зочдын дунд “Hamba Film” студийн захирал, найруулагч Д.Ганболд, гавьяат тамирчин Х.Цагаанбаатар эхнэр О.Гүндэгмаагийн хамт харагдсан бөгөөд эл үдэш жинхэнэ оддын цугларалт болсон гэлтэй. Гэтэл жүжиг дөнгөж эхлэх үест мисс Б.Бадамцэцэг найз охинтойгоо шивэр авир хийлцэн, хол ойрын сонин хачныг хамж шимээд ярьж гарлаа. Багагүй хугацаанд үргэлжилсэн эл чимээнд дургүйцсэн үзэгчид тэдэн руу янзгүйхэн харж суугааг ч эс тоосон мисс сүүлдээ бүр инээж гарах нь тэр. Угтаа бол, түүний инээсэн зүйл нь үхсэн эсэхээ ч мэдэхгүй төөрч будилж яваа залуу болон өвчиндөө шаналан буй хөөрхий охины нулимс байсан нь гайхмаар.

Үзэгчид нууцхан нулимс унагаж, дор бүртээ бодолд автан сууж байхад охид инээлдсээр л… Ийнхүү соёлгүй дээрээ ямар ч урлагийн мэдрэмж байхгүй миссийн инээд, сэтгэл хөдлөлөө дарж ядан нулимс дуслуулах үзэгчдийн гунигтай холилдсон жүжиг хэсэг хугацааны дараа өндөрлөсөн. Харин миссийн титэмтэй, бас загвар өмсөгчийн гуншинтай хоёр бүсгүй бие биеэ сугадан ихэд баяр хөөртэйгээр тайзны арын өрөөг зүглэсэн бөгөөд жүжигчдийг харсан даруйдаа уулга алдан гар барьж сүйд боллоо. Тэдний яриагаар бол, жүжгийг нь үзээд баахан “уйлсан” юм байх аа. Арай хэлэх гэсэн үгээ андуураагүй байгаа. Үүгээр ч зогсохгүй, хажуугаар нь зөрсөн Амбийд “Та ёстой мундаг юмаа” гэж зусар үг шидэхээ ч мартсангүй.

Олны нүдэн дээр соёлгүй аашилснаа ч юман чинээ тоохгүй байгаа Б.Бадамцэцэг найз охинтойгоо юуг ч юм ярилцан, элгээ эвхэртэл инээлдэн нэлээд зогссон бөгөөд “Бүхэл бүтэн улс орны нүүр царай болсон мисс гэхэд ичмээр юм” гэж ойролцоох хүмүүс нь ярилцахыг сонсох сөхөө ч түүнд байсангүй ээ.