Ихэвчлэн шударга ёс ярьж, олны анхааралд өртдөг тэмцэгч О.Магнай Шударга өрсөлдөөн хэрэглэгчдийн төлөө газрын

даргаар томилогджээ. Олон нийт яг л тохирсон хүнээ тавьж хэмээн ам сайтай байцгаана. Гэвч тэр олны энэ их итгэлийг хүлээж, ярьдаг шигээ шударга ажиллаж чадах болов уу. Түүнд шударга ёс ярихаас өөрөөр бүтээсэн ажил гэхээр юм байхгүй. Сонгуулийн үед шударга ёс ярьж байж үймээнд тос нэмсэн хэргээр шоронгийн хадаас болох шахсан, Иргэний хөдөлгөөний намыг үүсгэн байгуулж олон мянган гишүүн элсүүлсэн ч өөр нам руу хаяж явсан гээд л. Өөрөөр хэлбэл түүний улс төрд байгаад байгаагийн ганц шалтгаан нь шударга ёс ярих л байсан юм. Шударга имиж алдагдах л юм бол мань хүн дуусаа. Хэн ч биш болно. Чухам ийм учраас ШӨХТГ-ын даргар томилсон явдал бол түүнийг нэг бол мандуулах, нэг бол устгаж үгүй хийх хоёр талтай сонголт. Олон тэрбумын эрх ашиг сүлэлдэж байдаг энэ газар мань хүн шударга ажиллаж чадах юм бол карьер нь улам л өснө. Харин өнгөн дээрээ шоудаад, цаагуураа өөр юм хийгээд байвал өмнө нь нэг орж үзсэн газраа дахиад очих нь тодорхой. Тиймээс ШӨХТГ-ын даргар томилсон явдлыг улс төрчийнх нь үүднээс авч үзвэл түүнд том боломж олгосон, бас занга тавьсан хэрэг юм даа.

Б.Усгал

http://www.mminfo.mn/content/34092.shtml?alias=yellow