Монголд өмнө нь гарч байгаагүй олон компанийг хамарсан томоохон гэмт хэргийг УМБГ-ын Эдийн засгийн гэмт хэрэгтэй тэмцэх газар шалгаж байна. Нийт 2000 гаруй компаний захирал, нягтлан гээд 5000 орчим хүн НӨАТ-ын тухай хуулийн цоорхойг ашиглан мөнгө “иджээ”. Татварын ерөнхий газраас давхар НӨАТ төлж буй байгууллагуудыг давхар татвараас чөлөөлөхөөр болсон. Харин үүнийг нь энэ мэт олон тооны компани буруугаар ашигласан нь шалгагдаж байгаа юм. Компаниуд хоорондоо тохиролцоод НӨАТ-ын хэмжээгээ ихээр бичээд сарын эцэст буцаалтын мөнгө гэж авдаг байжээ. Одоогийн байдлаар эдгээр компаниуд улсад 500 гаруй тэрбум төгрөгийн хохирол учруулсан нь тогтоогдсон байна. Эдгээрийн ихэнхи нь Зуун айл, “Нарантуул” захаас бараа авдаг барилгын комданиуд аж. Хувиараа жижиг бизнес эрхлэгчид тэдэнд баталгаатай падаан авчирч өгч чаддаггүй учраас өөр жижиг компанитай хуйвалдан баримт дээр дуртай мөнгөө бичдэг байжээ. Хуулийн цоорхойг ашиглан эрүүгийн хэрэгт холбогдоод байгаа зарим компаний нэрс ч ил болсон байна. Үүнд:

-“Тэсрэлт зэв” ХХК
– “Эко констракшн”
– “Түмэн хишигт сайхан”
-“Хаан шилтгээ”
-“Танан” импекс
-“Хомын тал” ХХК
-“Пума” констракшн
– “Хосбар” констракшн
– “Рокмон” констраккшн
-“Силикат” констракшн
-“Байдраг” констракшн
-“Тэнгэр-Уул” ХХК
-“Бүргэд” ХХК
-“Танан” ХХК
-“Номинтал” ХХК
– “Булганхангай” ХХК орж байна. Хамгийн сонирхолтой нь илэрсэн зарим компаний захирал, нягтлангууд Өршөөлийн хуульд хамруулж өгөхийг хүсчээ. Тэдний буруутай гэдэг нь нотлогдвол мөнгө завшсан, татвараас зайлсхийсэн гэж 5-8 жилийн ял оноох юм байна.     Гэтэл тэд “Хохирлоо төлж болно, гэхдээ 5-8 жил шоронд суух хэцүү байна. Хэрэв биднийг Өршөөлийн хуульд хамруулвал бид хохирлоо барагдуулна. Харин мөнгөө төлөөд, тэртээ тэргүй шоронд сууна гэвэл хохирлоо барагдуулахгүй” гэж өчжээ. Энэ сүрдүүлэг маягийн хүсэлтээ тэд Засгийн газарт дуулгахыг шаардсан гэж эх сурвалж мэдээллээ.
Энэ мэт ухвал юу ч гарч ирэх хэргийн сэжүүрийг УМБГ-ын Эдийн засгийн гэмт хэрэгтэй тэмцэх албаныхан атгаж авчээ. Тэдний ихэнхи нь томчууд, баячууд, нөлөөтэй хүмүүс аж. Тиймээс “том загас” сүргээр нь “барьсан” тус албаны ажилтнуудыг уг хэрэг шийдэгдсэний дараа тушаал ахиулахаар ярьж байгаа гэж албаны эх сурвалж хэлсэн юм. Монголд өмнө нь ийм олон хүн нэг зэрэг холбогдсон хэрэг гарч байгаагүй. Ийм хуулийн цоорхой гарсны  бурууг Татварын ерөнхий газрын гаргасан НӨАТ-ын тухай шийдвэртэй ч холбож тайлбарлах нь байна. Энэ хэрэг Татварын ерөнхий газар болон сүртэй нэртэй ч сураг ажиг багатай байдаг Эдийн засгийн гэмт хэрэгтэй тэмцэх хэлтсийнхнийг “чанар”-ыг нэг шалгах нь. Үүнээс илүүтэйгээр татвараас зайлсхийж төсвийн мөнгө завшигчдад сайн сануулга болох вий.