УИХ-ын нэгдсэн чуулганаар хэлэлцэх асуудал эхнээсээ гацаалт үүсээд байгаа. Орон нутгийн сонгуулийн тухай хуулийн төслийг хэлэлцэх эсэх асуудлаар “Шударга ёс” эвсэл завсарлага авсан бол МАН-ын бүлэгтэй болох эсэхийг шийдэх хуулийн төслийг хэлэлцэхгүй гэдгээ УИХ-ын дарга мэдэгдсэн юм. Энэ асуудалтай холбогдуулан МАН-ын удирдлагууд болон гишүүд мэдээлэл хийж эхэлсэн бөгөөд УИХ-ын гишүүн Ц.Нямдорж байр сууриа илэрхийллээ. Тэрбээр хэлэхдээ “МАН-ыг бүлэггүй гэж боомилж байгаа жүжгээ зогсоох нь дээр. Бүлэг гэдэг юмыг чинь тэр Энхболд байтугай их хурал ч байгуулдаг юм биш. Сонгогчид байгуулдаг юм. Үндсэн хуулийн 24 дүгээр зүйлд “Сонгуулийн үр дүнгээр бүлэг байгуулах эрхтэй болсон нам, эвслээс их хурлын даргыг сонгоно” гээд заачихсан байдаг. Эд нар 24 цагаас шалтаглаж олон юм ярьж байна. Энэ засаг тогтвортой ажиллах бааз суурь нь МАН байж таарна шүү гэдгийг шударгаар хэлье” хэмээн бүлэгтэй болох асуудлаар байр сууриа илэрхийлсэн юм. Ц.Нямдорж гишүүний хамгийн их бухимдал төрүүлсэн асуудал нь З.Энхболд дарга аж. З.Энхболд даргаас болж маргалдсан хоёр гишүүний асуудалд ямар байр суурьтай байгааг тодруулахад  “Одоо энэ З.Энхболд гэдэг хүн чинь АН-ын зодуурын хэрэгсэл болоод хувирчихлаа шүү дээ. Их хурлын дарга бол энэ олон нам, эвсэл, бүлэг хоорондын эв зүйг зохицуулж байдаг зохицуулагчийн үүрэгтэй албан тушаал. Өөрөөр хэлбэл, эви йн цавуу байх ёстой. Намайг их хурлын дарга байхад манай хэдэн нөхөд АН-ынхантай хөгийн хэрүүл хийсэн юмдаг. Тэгэхээр нь би АН-ын бүлэг дээр ороод “Одоо та нар больчих” гээд уучлалт гуйгаад сууж байсан шүү дээ. Энэ төрийг тогтворгүй байлгах бүх өдөөн хатгалгыг З.Энхболд хийж байна. Тэд нар хоорондоо учраа олно биз. Би аль алинд нь хэлсэн шүү дээ. Г.Баярсайхантай ч уулзсан. “Эр хүмүүс байж хоорондоо учир зүйгээ олцгоо. Энэ чинь зохисгүй үйлдэл байна. Нэг нь заамдаж, нөгөө нь цохисон болохоор хоёулаа буруутна. Та нар хохирогчийн дүр эсгэж гонгинож гүйгээд байх хэрэггүй” гэж хэлсэн дээ. Шүүхэд хандах дээрээ тулбал аль, аль нь л хандана. Энэ хэрэг ёс зүйн хороогоор орж магадгүй. УИХ-ын чуулганы  хуралдаан дээр тэр Г.Баярсайхан чинь өөрөө У.Хүрэлсүхийг “Шоронд байх ёстой хүн” гэж баахан доромжилсон юм байна лээ. Эд нар ер нь хүнийг шорон гянданд суулгадаг хэн юм бэ. Хүнтэй шорон гяндан ярьдаг газар чинь АТГ, цагдаа, шүүх, прокурор л байдаг шүү дээ. Энэ их хурал шүүгчийн үүрэг гүйцэтгээд их удлаа. 2008 оноос хойш л баахан шүүгч энд ороод ирчихсэн. Зарим нь бүр хонгио барьчихсан явж байгаа. Г.Баярсайхан танхай балмад юм ярьж, муухай доромжилсон болохоор л У.Хүрэлсүхэд цохиулсан юм билээ” хэмээсэн юм.

Б.Тогтох

www.mminfo.mn