Хийлч Ч.Дэлгэрцэцэг буюу Дээгийгээс “W” клубийнх нь талаар сонирхлоо.

-Яагаад клуб байгуулах болсон юм бэ?

-Уран бүтээлийнхээ хажуугаар хоёр жил гаруй бүсгүйчүүдэд зориулсан нэвтрүүлэг хөтөлсөн. Нэвтрүүлгээ хөтлөхөд эмэгтэйчүүдийн асуудлыг ингэж шийдэх юмсан, тийм ажил хийхсэн гэсэн олон санаа орж ирдэг байлаа. Би өөрөө эмэтгэй хүн болоод ч тэр үү бүсгүйчүүдэд тохиолддог бүхий л асуудал, сайн сайхан бүхнийг мэддэг учраас надад их сонирхолтой санагдсан. Миний нэг хобби болсон гэх үү дээ. Тэр утгаараа бүсгүйчүүдэд нийгмийн хөгжлийн үйл явцыг дагаж нийгэмших тал дээр нь тус болох, өөрийнхөө хязгаарлагдмал тойргоосоо гараад бусадтай танилцах, бусдаас, суралцах, хамгийн гол нь өөрийгөө олж авахад нь туслах гэсэн үндсэн санаа маань клуб байгуулахад тулгуур болсон. Клубийн маань нэр “W”. Woman буюу эмэгтэй гэсэн үгний эхний үсэг юм.

Эмэгтэй хүн бүхэнд өөрийн гэсэн шигтгээ, мэдлэг, мундаг чаддаг зүйл, арга чарга байдаг. Өөрийнхөө чадах бүхнээ бусадтай хуваалцаж, харин бусдын шигтгээг өөртөө наах нь манай клубийн гол зорилго.

-Клубийнхээ нээлтийг Мартын наймны баяраар хийж байсан билүү?

-Тийм ээ. Би дөрвөн найзтайгаа нийлээд энэ клубийг байгуулж энэ оны гуравдугаар сарын 8-нд нээлтээ хийж байсан. Манай клубийн үйл ажиллагаа их энгийн, сар болгоны 8-нд бүгдээрээ уулзаж хурлаа хийнэ. Сард нэг удаа онцгой үйл явдал зохиодог. Өөрийгөө хэрхэн хөгжүүлэх вэ, нүүрээ яаж будвал сайхан харагдах вэ гэдэг ч юм уу тухайлсан сэдэвтэй эсвэл өөртөө байгаа илүү зүйлсээ хоорондоо солилцох, худалдаалах шоппингийн сар ч байж болно.

-Танай клубийнхэн өрх толгойлсон эхчүүдэд тусалсан гэж дуулсан юм байна?

-Миний бодлоор сайн сайхан явахын үндэс нь хэр их буян хийснээс шалтгаалдаг болов уу. Энэ тал дээр бид санаа нийлээд Чингэлтэй дүүргийн өрх толгойлсон эмэгтэйчүүдэд тусалсан. Уг үйл ажиллагаа маань бид бүгдийн сэтгэл нийлсэн буяны үйл ажиллагаа болсон доо.

-Хоол хийх сар байдаг гэсэн үү?

-Тийм ээ хоол хийх сартай. Тэр сард бүгдээрээ нэг газар цуглаад янз янзын хоол унд хийдэг. Тэгээд ер нь эхнэр хүн гэр бүлийн хамгийн чухал хүн. Ээж, эхнэр хүн л аз жаргалтай байвал гэр бүл тэр чигээрээ аз жаргалтай байдаг гэж ярьдаг шүү дээ. Тэгэхээр бүсгүйчүүд маань клуб руугээ явахдаа нөхөртөө ч гэсэн сэтгэл хангалуун хэлээд явах хэрэгтэй. Эхнэр нь клубийн уулзалтад нэг их сайхан гоёод л сэтгэл өөдрөг явна. Тэгээд уулзалтаасаа бүр сэтгэл өндөр ирэх юм бол нөхрүүд нь маш тааламжтай хүлээж авна. Ингээд л уулзалтад нь уриалгахан явуулдаг болно шүү дээ.

-Тэгвэл ирж буй есдүгээр сар ямар сэдэвтэй байх вэ?

-Энэ наймдугаар сар “shopping” сар. Өнөөдөр “Голомт” хотхонд цуглараад өөртөө байдаг өмсч амжаагүй шошготой хувцаснуудаа солилцох ч юм уу тийм маягаар өдрийг өнгөрөөнө гэж бодож байгаа. Харин хичээл эхэлж байгаатай холбогдуулан есдүгээр сард хөдөөнөөс ирж байгаа хүмүүст зориулан “Хотын соёлыг мэдрүүлэх сар” гэсэн нэртэй үйл ажиллагаанууд зохионо.

Охид бүсгүйчүүддээ хандаж хэлэхэд эмэгтэй хүн олон шигтгээтэй байх тусмаа илүү хурц гялалздаг юм.

Э.АЛТАНЦЭЦЭГ Н.ЭНХМАА