Монгол Улсын Ерөнхийлөгч Ц.Элбэгдорж шүүхийн шинэтгэл хийж, иргэн бүрт адил тэгш үйлчлэх шударга шүүхийг бий

болгохын төлөө уриалж байгаа. Зөвхөн уриалаад зогсохгүй ажил хэрэг болгож байгааг шүүхийн үйл ажиллагаанаас харж болох юм. Тухайлбал, авлига, хээл хахууль, улсын хөрөнгө шамшигдуулсан, эрх мэдлээ ашигласан гэх олон Засаг дарга нартай хариуцлага тооцсон. Шүүх засаглал хэн нэг эрх мэдэлтний өмнө сөгдөөгүй. Харин ч сөрж чадсан. Үүгээрээ Монголын шүүх жинхэнэ утгаараа шударгаар ажиллаж байна. Хамгийн ойрын жишээ хэлэхэд сонгуулийн үеэр иргэдийн саналыг мөнгө, эд зүйлээр худалдаж авахыг оролдсон өрсөлдөгчийнхөө эрхэнд халдсан олон санал гомдол гарсан. Энэ бүгдийг тойргийн хороо, Сонгуулийн ерөнхий хороо, цаашлаад шүүх шийдвэрлэсэн юм. Тухайлбал, Өвөрхангай аймгийн 10 дугаар тойрогт Ардын намаас нэр дэвшсэн Н.Төмөрхүү, С.Чинзориг нар насанд хүрээгүй хүүхдүүдийг сурталчилгааны ажилд дайчлан сарын 150 мянган төгрөгийн цалин өгсөн. Мөн орон нутгийн иргэдээр дамжуулан архи тараасан. Үүгээр зогсохгүй мөнгө тарааж байгаа бичлэг нь сонгуулийн дараахан олон нийтэд ил болж, шуугиан тарьж байсан нь саяхан.

Энэ асуудлыг тойргийн хороо, Сонгуулийн ерөнхий хорооны зүгээс хуулийн байгууллагаар шийдвэрлүүлэхийг хүссэн байдаг. Ийнхүү нийслэлийн Хан-Уул дүүргийн шүүхэд өргөдөл гаргаж, шийдвэрлүүлсэн. Уг шийдвэрээр Ардын намаас нэр дэвшсэн Н.Төмөрхүү, С.Чинзориг нарыг хууль зөрчсөн нь нотлогдсон юм. Үүний дагуу Сонгуулийн ерөнхий хороо тэднийг парламентад оруулах боломжгүй гэж үзэн УИХ-ын гишүүний түр үнэмлэхийг нь өгөөгүй. Гэвч шүүхийн шийдвэрийг хүлээн зөвшөөрөхгүйгээр үл барам шүүх хэн нэгний хараатаар ажилласан гэж гүтгэх нь ёс бус үйлдэл болов уу. Шүүх засаглалд шударга ёсыг тогтоохын төлөө ажиллаж байхад доош нь татах сонирхол хийгээд хүсэл нэлээд хүнд бий бололтой. Монголчууд шинэ ажлыг эхлэх, сайн яваа нэгнээ хойш нь татахтай сайн улс. Гэхдээ энэ сэтгэхүйгээ өөрчлөх цаг хэдийнэ болжээ. Шударга ёс, эрх тэгш байдал нийгэмд тогтохын хэрээр бидний ирээдүй илүү баталгаатай болох биш гэж үү. Тийм байтал өнөөдөр хэн нэг улстөрчийг парламентад оруулж ирэхийн төлөө Хууль зүй, дотоод хэргийн сайд Ц.Нямдорж хүртэл муйхарлан зүтгэх нь юуных вэ. Шүүх хэнээс ч хараат бусаар шударга шийдвэр гаргах нь буруу гэж үү, эрхэм сайд аа. Хууль батлагчид өөрсдөө хуулиа дээдлэхгүй байх нь зохистой биш баймаар гэдгийг ойлгох биз ээ.

Шүүх засаглал ард түмний эрх ашгийн төлөө, хамгийн гол нь шударга үнэний талд тууштай зогсож байвал сая шүүхийн шинэтгэлийг ажил хэрэг болголоо гэсэн үг юм. Ерөнхийлөгч нэгэнтээ хэлсэн байдаг. Шүүх дуудсан бол зангиагаа засаад очих ёстой гэж. Хуулиа дээдлэхгүй бол маргалдаж, мэтгэлцэн байж батлахын хэрэг юун. Мөн баталсан хуулиа хэрэгжүүлэх нь чухал болохоос биш “хөнжил”-дөө хууль засаад, болохгүй бол намынхаа эрх ашгийн төлөө хүссэнээрээ өөрчлөлт оруулахын нэр биш юм шүү. Манай улсын шүүх өнөөдөр хараа хяналтгүйгээр ажиллах нөхцөл бий болж буй энэ үед “Шүүх хэзээ ийм байлаа” гэх өнгө аясаар хандаж болохгүй юм. Яагаад манай шүүх асуудлыг хурдан шийдвэрлэж, үр дүнгийг нь харуулж болохгүй юм бэ. Тиймээс улстөрчид, сайд, дарга нар аа шүүхэд нөлөөлөхийг битгий оролдооч. Наанаа шүүхэд нөлөөлдөггүй, ингэж болохгүй гэж хэлдэг хэдий ч цаанаа байдал эсрэгээрээ байдаг. Үүнийг л хамтдаа өөрчлөх талаар Хууль зүй, дотоод хэргийн сайдаас авахуулаад ярих л хэрэгтэй байна.

olloo.mn