Шинэ УИХ-ын гишүүд тангаргаа өргөлөө. Нийт 69 гишүүн тангараг өргөж, 7 гишүүний суудал бүрэн тодроогүй байна.

Гэсэн ч УИХ-ын үйл ажиллагаа хэвийн явагдана. Засгийн газрыг эмхлэн байгуулах ажил өрнөх учиртай. Парламентад олонхын суудал авсан АН Засгийн газрыг санаачлах ч, дангаар байгуулах боломжгүй юм. Иймээс хамтарсан Засгийн газрыг АН-ын зүгээс МАН болон МАХН-МҮАН-ын Шударга ёс эвслийн аль нэгийг сонгох шийдвэрийн өмнө ирээд буй юм. АН дээрх хоёр хүчний аль нэгийг Засгийн газарт урихаас өөр боломжгүй, хэн нэгэнтэй нь хамтарна. Харин Засгийн газрын тэргүүн Ерөнхий сайд хэн байх бэ гэдэг асуудал сөхөгдөөд байна. Ерөнхий сайд мэдээж АН-аас гарч таараа. Гэхдээ АН-ын дарга Н.Алтанхуяг уу, аль эсвэл З.Энхболд, Х.Баттулгын хэн нь бэ. Намын дотоод журамд намаа ялуулсан бол намын дарга нь Засгийн газрын тэргүүнээр сонгогдох учиртай аж. Гэвч энэ сонгуулиар АН бусад намуудаас илүү суудал авсан ч, үнэмлэхүй ялалт байгуулж чадаагүй. Тодруулбал Засгийн газрыг дангаар байгуулах хэмжээний 39 суудал аваагүй нь ялалт биш гэж үзэх гишүүд байгаа юм. АН 39 суудал авах боломж байсан, үүнд намын дарга, удирдлагууд нь буруутай хэмээн нөлөө бүхий лидерүүд шүүмжлэл өрнүүлээд буй. Түүний нэг нь УИХ-ын гишүүн, МоАХ-ны ерөнхийлөгч Х.Баттулга юм.

Сүүлийн өдрүүдэд Х.Баттулга намын дарга, удирдлагуудтайгаа хариуцлага тооцох асуудлыг ярьж эхэлсэн нь АН-ын том фракцуудын дунд намын даргын төлөөх өрсөлдөөнийг эхлүүлэхэд хүргээд байна. Тэрээр нэгэн хэвлэлд ярилцлага өгөхдөө “Ардчилсан нам УИХ-д олон болж чадсан ч олонх болж чадсангүй. Бусадтай эвсч Засгийн газар байгуулах нөхцөлд орчихоод байна. Парламентад нөгөө талд хэн, хэн байна вэ хар даа. Тэгэхээр олонх болж чадаагүйн хариуцлагыг намын удирдлагуудтай ярих ёстой. Тухайлбал, намын дарга Н.Алтанхуяг, ерөнхий нарийн бичгийн дарга Д.Эрдэнэбат, УИХ дахь бүлгийн ахлагч Ч.Сайханбилэг нартай хариуцлагын асуудлыг ярих биз ээ” хэмээжээ.

Х.Баттулгын энэхүү байр сууриас ажвал, ирэх өдрүүдэд АН-ын удирдлагуудад хариуцлага тооцох асуудал сөхөгдөх нь. Түүнтэй санаа нэгдэх хүн бол УИХ-ын гишүүн, Ардчилсан хүчний холбоо, Шонхор фракцын тэргүүн З.Энхболд юм. Ойроос Х.Баттулга, З.Энхболд нар уулзалдаж эхэлсэн гэх мэдээлэл байна. Лидерүүд намын дарга удирдлагууддаа хариуцлага тооцох асуудлаар ярилцаж эхэлсэн бололтой юм. Өнгөрсөн дөрвөн жилийн турш хамтарсан Засгийн газрын үед З.Энхболдын фракц намын даргаа өөрчлөхийн төлөө дуугарч ирсэн ч хүчин мөхөсдөж байв. Харин Х.Баттулгатай хагас жилийн өмнөөс нөхөрлөж, санаа зорилго нэгдэж ирсэн. Ирэх өдрүүдэд АН-ын даргын халаа, сэлгээний асуудал хүчтэй өрнөх бололтой. АН их хурлаа зарлаж, ҮЗХ-гоо хуралдуулж Н.Алтанхуягийг даргаас нь буулгах ажил өрнөж магадгүй байна.

Харин оронд нь хоёр эрхмийн нэг нь намын дарга, нөгөө нь Ерөнхий сайдын суудлыг авах тохироо энэ хоёрын дунд яригдсан байхыг үгүйсгэмгүй юм. Намын дарга заавал Ерөнхий сайд байх албагүй. Энэ үүднээсээ нэг нь намын дарга нөгөө нь Засгийн газрын тэргүүний суудалд суух боломжтой. Мөн намын дарга болсон нь шадар сайд болно гэх зэргээр ямар ч хувилбар байж болно. Гэхдээ энэ бүхэн санаан зоргоор болохгүй л болов уу. Засгийн газрыг ойрын хугацаанд байгуулах шаардлагатай энэ үед, АН дотооддоо хагаралдаж эхэлбэл ард түмэнд ихээхэн шүүмжлэлд өртөнө.

Х.Баттулга, З.Энхболд хоёр намын их хурлаа хуралдуулж, Н.Алтанхуягийн суудлаас нь сугална гэдэг амаргүй. Гэхдээ тэгж чадвал З.Энхболд, Х.Баттулга хоёрт АН-ын даргын суудал “бонус” (Ерөнхий сайдын алба)-тайгаа ороод ирнэ л гэсэн үг. Н.Алтанхуяг, З.Энхболд, Х.Баттулга нарын хэн нь Ерөнхий сайд болох бэ гэдэг асуудал гишүүдийнх нь дунд ярианы сэдэв болж эхлээд байна.

Т.АМУР
ollloo