Сүүлийн үед улстөрийн байдал нэлээд тогтворгүй болж, нийгэм тэр даяараа бухимдалтай байгаа гэхэд хилсдэхгүй. Ялангуяа өнгөрсөн 13-ний өдөр Монгол Улсын гуравдахь Ерөнхийлөгч, МАХН-ын дарга Н.Энхбаярыг албадан баривчилсан нь олон нийтийн бухимдлыг төрүүлж, наян настай буурлаас, найман настай балчир хүртэл улстөр ярьж эхэлсэн.

Ард түмний ярьж байгаагаар хэдийгээр Н.Энхбаяр нь “Авлигын загалмайлсан эцэг” гэж нэрлэгддэг ч Төрийн  тусгай хамгаалалтанд байх хугацаа нь дуусаагүй байхад ийм балмад, хүч хэрэглэн баривчлах нь буруу хэмээн үзэж байгаа юм. Мөн түүнийг баривчлагдах үед УИХ-ын зарим гишүүн гэрт нь байсан бөгөөд тэд ч мөн баривчлагааны үеэр багагүй “жавтий” хүртээд авсан. Энэ үйл явдал олон нийтэд нэлээд хүнд туссан бөгөөд энэ хэргийн талаар улстөрчид ч фэйсбүүк, твиттерээр санал бодлоо солилцсоор байгаа юм.  Тухайлбал УИХ-ын гишүүн Х.Баттулга үйл явдал өрнөж байх үед твиттер хуудсандаа “За ингээд Ц.Нямдоржтой муудалцвал хэн ч байсан шорон руу яваад байдаг юм даа” хэмээн ХЗДХ-ийн сайд Ц.Нямдоржийг буруутгасан байдлаар санал бодлоо бичсэн байсан. Харин Сангийн сайд Ч.Ганхуяг “Төрийн дээд албан тушаалтай байсан, төрийн тусгай хамгаалалтанд байгаа хүнийг ингэж байгаад их гайхаж байна” хэмээн бичжээ.
Н.Уранхас uls.mn