Экс Ерөнхийлөгч Н.Энхбаярыг өнөө өглөөний 06 цаг 08 минутад цагдаагаар хамгаалуулсан тусгай хүчнийхэн сүрийг үзүүлэн зэрлэг балмадаар баривчлан авч одсон. Өчигдөр шөнө 03 цаг 50 минутад түүний төрийн тусгай хамгаалалтыг татан буулгаж, намынх нь журмын нөхдийн дунд төр, засаг үлдээлээ.

Улс орны хэмжээнд аюул, түгшүүрийн дохио хангинаж Монгол улсын тусгаар тогтнол 24 цагийн турш ганхаж байна. Удирдлагын академийн баруун урд талд байрлах экс Ерөнхийлөгчийн амьдарч байгаа орон сууцны гаднаас оройн 20 цаг 18 минутад түүнийг баривчлах гэсэн үйл ажиллагаа сунжирч цаашлаад олон нийт болоод хүчний байгууллагуудын тэмцэл болтлоо өргөжсөн.

Түүнийг өглөөний 05 цагаас хойш баривчлах гэсэн арга хэмжээ улам эрчимжиж амьдарч байгаа гэрийг нь олох гэж тусгай хүчнийхэн гурав, дөрвөн давхрын бүх айлуудын төмөр хаалгыг царил, бороохой, цахилгаан хөрөөгөөр хэмх цохиж, орон гэрт нь ямар ч прокурорын зөвшөөрөлгүйгээр халдаж, дотор нь амьдарч буй эгэл жирийн иргэнийг өмссөн хувцастай нь хөөж гарган зодож занчсан байна.

Мөн УИХ-ын гишүүдийн халдашгүй дархан байдалд халдаж, нөгөө л нэг харанхуй шөнөөр эгэл ардаа хоморголон баривчилж, голомтыг нь самардаг 1937 оны хэлмэгдүүлэлт шиг харгис хэрцгий балмад үйл ажиллагааг МАН, АН доторх улс төр, эдийн засгийн бүлэглэлүүд хэрэгжүүлсний тод жишээ энэ боллоо. Олон улсын тавцанд Монгол улсын нэр хүнд навс унаж, хүний эрхийн байгууллагуудын хараанд орж, ардчилал яриад 20 жил болсон Монгол улс ардчилалгүй гэдгээ дахин нотоллоо.
Н.Дүүрэн (www.wikimon.mn)