Эсгий хийх газар нохой хэрэггүй гэгчээр Х.Баттулга, Ц.Нямдорж хоёрын хэрүүл Л.Гүндалайгаар л дутаж гэнэ.

УИХ-ын гишүүн Х.Баттулга өчигдөр Ерөнхий сайд С.Батболд, ХЗДХ-ийн сайд Ц.Нямдорж, ЭБЭХ-ний сайд Д.Зоригт, ЗГХЭГ-ын дарга Ч.Хүрэлбаатар нарыг шалгуулах хүсэлтээ Улсын Ерөнхий прокрурорт өгөв. Х.Баттулгыг АТГ-т очсон шигээ МоАХ-ны гишүүдтэйгээ ирэх байх гэтэл УИХ-ын гишүүн Л.Гүндалай тэдэн дээр нэмэгдсэн байлаа. Тэд Улсын Ерөнхий прокурор Д.Дорлигжавд хүсэлтээ өгөх гэсэн боловч эзгүй байгаа гэх шалтгаанаар Тамгын хэлтсийн дарга Б.Үнэнбат хүлээн авсан юм. Ингэснээр Х.Баттулгын улстөрчдийг шалгуулах хүсэлтийг АТГ-ын дарга Н.Ганболд, Улсын Ерөнхий проукрор Д.Дорлигжав нарын хэн нь ч өөрсдийн биеэр хүлээж авсангүй.

Харин Х.Баттулга, Ц.Нямдорж нарын тулаанд Л.Гүндалай орж ирсэн нь эсгий хийх газар нохой хэрэггүй гэдэг шиг санагдсан. Энэ удаагийн Ц.Нямдоржийг шалгуулах асуудлыг Х.Баттулга гэхээсээ илүү Л.Гүндалай голчлон тайлбарлаж байв. Яг л хуучных шигээ бүх асуудлыг Ц.Нямдорж руу чиглүүлж, элдвээр ёжилж, хэсэг чимээгүй байсан хэл амныхаа загатнааг гаргаж байлаа. Хэдийгээр Ц.Нямдоржийн талд МАН, Засгийн газар тэр чигээрээ зогсож байгаа боловч Х.Баттулгын ар талын нөөц түүнээс дутахааргүй болжээ.

Наанаа МоАХ-ны хэдэн гишүүд, дэмжигчид байгаа мэт боловч цаана нь Н.Энхбаяр, М.Энхсайхан, Б.Жаргалсайхан тэргүүтэй МАХН-ынхан бий. Бүр цаашилбал Ерөнхийлөгч Ц.Элбэгдорж байгаа гэх яриа улстөрчдийн дунд хөвөрч байна. Гэсэн ч Х.Баттулгад олон нийтийн өмнө ил салбаганах Л.Гүндалайгийн «гүнбалайрал» хэрэгтэй байжээ. Л.Гүндалайгийн хувьд Н. Энхбаярыг Ц. Нямдоржтой дайтахад чимээгүй ажиглаж суусан. Гэтэл тэрбээр гэнэтхэн Х.Баттулгыг дагаж намирсаар Улсын Ерөнхий прокурорын газарт ирсэн юм.

Б.Даваахүү

ugluunii sonin