Хаврын эхэн сарын шинийн гурванд хөдөлмөр, бүтээлээ үнэлүүлж энгэртээ Хөдөлмөрийн гавьяаны улаан тугийн одон гялалзуулсан хошин урлагийн нэрт жүжигчин Ц.Батхуяг (Амбий) одонгийнхоо найрыг төрөлх Дорнод аймагтаа хийж, бие нь чилээрхүү байгаа ч ёс болгож гурван хундага татаж олон түмэнтэйгээ жаргал, зовлонгоо хуваалцаад иржээ.

Ирсэн даруйдаа Монголын театрын нэрт бүтээл “Найрын ширээний ууц”-ыг дуулалт жүжиг маягаар тайзнаа тавихаар ажилдаа ханцуй шамлан орж хошин урлагийн Эрдэнэзаан, Бямбацогт, Манлай, Мөөжигөөс эхлээд олон хүмүүсийг энэхүү уран бүтээлдээ урин залж тоглуулахаар бэлтгэл ажилдаа ороод байна.

Энэ дашрамд мөн л хувийн бизнесээ амжуулж нэгэн банкны гадаа Lexus 470 машинаа тавин ороод, гараад ирэх хооронд арынх нь цонхыг хагалан дотор нь байсан цүнх, эд зүйлийг нь хулгай аван талийж өгсөн байжээ. Энэ байдлыг хорооны цагдаа банкны камераар шүүлгэж байгаа бөгөөд эрхэм жүжигчин маань “Гарах юм гараа л биз” хэмээн асуудлыг үл тоосон шинжтэй орхижээ.
Г.Амар wikimon