Телевизийн хөтлөгч бүсгүйтэй үерхэж, хоёр дахь амьдралаа зохиож буй дуучин Л.Болдбаатар сүүлийн үед арга хэмжээ хэсдэг ажилтай болжээ. Энд тэндхийн баяр наадам, нээлтийн арга хэмжээнд хэдийнэ оччихсон байдаг мань эр хэн нэгнийг дагуулж явдаггүй юм билээ. Харин өнгөрсөн долоо хоногт болсон “Бурхан өршөөг” киноны нээлтэд тэрбээр бусдын эхнэрээр “гоёсон” нь хүмүүсийг баахан төөрөгдүүлжээ. Учир нь, уг киноны гол дүрд тоглосон жүжигчин М.Баярмагнай хэвлэлийнхэнтэй уулзах зуур түүний эхнэр болох залуухан бүсгүй дуучин эрийг хань татаж зогссон. Л.Болдбаатар ч эхнэртэйгээ байгаа мэт ихэд дотно ярилцаж, бүр хүүг нь хүртэл тэвэрч харагдана лээ. Үзэгчид тэднийг харан өөр зуураа шивнэж “Энэ нөгөө хөтлөгч хүүхэн нь юм байх даа. Баярмагнай яагаад үе үехэн тэр хүүхэн рүү дөхөж ирээд байгаа юм бол” гэж гайхжээ. Харин тэднийг хамтдаа зураг хөргөө авахуулж буйг харсан М.Баярмагнай сандарсан мэт гүйж ирээд эхнэр хүүгээ “өөр дээрээ” авч, олны эргэлзээг арилгасан юм. Үүгээр ч зогсохгүй, гэр бүлийнхэнтэйгээ хамт зургаа авахуулж байхад дуучин эр ч “Би юунаас нь дутахав” гэсэн шиг гэрэл зурагчдын дуранд багтахыг хичээж байв. Царайлаг эхнэртэй байхын зовлон юм уу даа, энэ чинь.

Р.ЕСҮЙ