“Өргөн талд түшиж яваад өндөр дээрээс түлхэнэ” гэдэг үг нь өдгөөгийн Ерөнхий сайд У.Хүрэлсүхэд зориулсан мэт. Эдийн засгийн өсөлт 17 хувь хүртэл гаарч, гаднын хөрөнгө оруулалт зогсоо зайгүй үерлэж байхад улстөрийн ууган хүчин 45 суудалтай засгийн эрх барьж, улмаар У.Хүрэлсүх намынхаа Ерөнхий нарийн бичгийн даргын суудалд заларч байв. МАН-ын олон мянган гишүүдийн итгэл үнэмшил дээр тонгочиж байсан У.Хүрэлсүх Ком-Интерний хуралд сууж ирээд МАН-ыг хагалан бутаргах ажиллагаа явуулав.

Түүний эв нэгдлийн эсрэг ажиллагааны улмаас олон туршлагатай гишүүд бараа бологчдоо дагуулан Н.Энхбаярын нөмөр бараадаж байсан ердөө өчигдрийн түүх. Д.Тэрбишдагва, Ч.Улаан, Ц.Шаравдорж гээд олон хүнийг нэрлэж болно. Үүнээс гадна У.Хүрэлсүхийн шахалт дарамт, эв нэгдлийн эсрэг ажиллагааны улмаас Ц.Даваасүрэн, Х.Болорчулуун нарын нөхөд арга мухардахдаа бие даан УИХ-д нэр дэвшиж байсныг та бүхэн мэдэж буй. Энэ бүх зүйлээс үүдэн 2012 оны сонгуульд ялагдал хүлээсэн нь У.Хүрэлсүхийн ажиллагааны үндэс байсан гэхэд болно.

Үүнээс гадна “Зовох цагт нөхрийн чанар танигдана” гэдэг үг аанай л манай Ерөнхий сайдад зориулсан мэт. МАН 2012 оны сонгуульд У.Хүрэлсүхийн “буянаар” ялагдал хүлээсэн ч жагсаалтад дээгүүр эрэмбэ эдэлсэн У.Хүрэлсүх УИХ-ын гишүүн болсон билээ. Ийнхүү намаа ялагдалд хүргэсэн тэрбээр хувийн шалтгаанаар УИХ-ын гишүүний бүрэн эрхээс татгалзаж их ялагдлын дунд тэр нөхдөө орхин гадагшаа одож байсныг бид мэднэ. Яахав, гэр бүлийнх нь хүн хүнд өвчний улмаас чөлөөлөгдөх хүсэлтээ гаргасан нь үнэн. Хамгийн гол нь энэ ялагдлын дараах жилүүдэд /2012-2016/ тэр намын үйл ажиллагаанд нэг ч удаа оролцсонгүй. Ямар сайндаа улстөрийн зарим ажиглагчид, сонирхогчид У.Хүрэлсүх гэдэг хүний улстөрийн карьер дууслаа гэж хэлж бичиж байлаа. Мань хүн харин далдуур хор хутгаж явсныг төдийлөн олон хүн мэдэхгүй байх. Ялагдал хүлээсэн МАН удирдлагаа сольж 2012-2016 оны хооронд ард түмний дунд чамгүй ажилласан, нийгэмд тулгамдсан олон ажлыг шийдвэрлэх тал дээр ажилласны үр дүнд 2016 онд тэд үнэмлэхүй ялалт байгуулсан билээ. Өдгөө ч МАН-ын олон гишүүд дэмжигчид ялалтад хүргэсэн М.Энхболд, Ж.Мөнхбат нарт талархаж явдгийг бид мэднэ. Харин энэхүү үнэмлэхүй ялалтын дараа намын удирдлагууд гар хумхин суусан У.Хүрэлсүхийг Шадар сайдын суудалд суулгасан нь дэндүү зөөлөн хандсан хэрэг болов.

Харин тэр зөөлөн суудал өгсөн хүмүүсийнхээ эсрэг турхирсан явдал нь МАН-ын түүхэнд байгаагүй явдал болсон төдийгүй “Ачийг бачаар” гэдэг л болсон. Намынхаа эв нэгдлийг хоёр хувааж, өрсөлдөгч АН-тай үгсэн хуйвалдаж, Ерөнхийлөгч Х.Баттулгаар дэмжүүлж Ерөнхий сайд болсон гэдгийг ч хүмүүс мэднэ. Өнөөдөр энэ улстөрийн хүчинд эргээд хэзээ нэгдэх нь мэдэгдэхгүй ан цав үүсчихээд байна. Магадгүй У.Хүрэлсүхийн энэ үүсгэсэн ан цав 2012 оны ялагдлыг ч авчрах магадлал өндөр харагдаж байгаа юм.

С.Баяр

Шуурхай.мн