Тавхан настай бяцхан охиныг хойд эцэг нь хүчирхийлсэн гэх аймшигт хэргийн дуулиан намжаагүй байтал гурван настай охин төрсөн эцэгтээ хүчирхийлүүлсэн гэх аймшигт хэрэг дахин гарсан байна. Төв аймагт гарсан энэхүү хэргийн золиос болсон гуравхан настай охин өдгөө ээжийнхээ хамт аймгийнхаа эмнэлэгт хэвтэн эмчлүүлж байгааг баттай эх сурвалж мэдээлэв.

-ОХИН “ААВ НАМАЙГ ӨВТГӨӨД БАЙНА” ГЭЖ ЭЭЖДЭЭ ХЭЛДЭГ БАЙЖЭЭ-

Энэхүү жигшүүрт хэргийн дуудлага мэдээлэл энэ сарын 22-нд Хүүхдийн тусламжийн 108 дугаарт ирсэн бөгөөд Төв аймгийн Гэр бүл, хүүхэд залуучуудын хөгжлийн хэлтсээс мэргэжил арга зүйн зөвлөгөө өгч, эрүүл мэндийн болон сэтгэл зүйн тусламж үйлчилгээ үзүүлжээ. Улмаар асуудлыг тодруулж үзэхэд хүчирхийлэл үйлдэгч төрсөн эцэг нь өөрийн төрсөн охиныг ганц удаа ч биш олон удаагийн үйлдлээр хүчирхийлсэн байж болзошгүй нөхцөл байдал тогтоогдоод байгаа аж.

Охин энэ талаар ээждээ “Аав намайг өвтгөөд байна” гэж хэлдэг байсан ч ээж нь үүнд нь итгэхгүй, охиныхоо үгэнд биш нөхрийнхөө үгэнд итгэсээр өдийг хүрсэн тухайгаа мэдүүлсэн байна. Тиймдээ ч охиноо хүчирхийлэлд өртдөг байсныг нь өөрөө мэдэж, дуудлага мэдээлэл өгөөгүй бөгөөд охин эмнэлгийн үзлэгт хамрагдах үед энэ нь илэрч, эмнэлгийн ажилтнууд Хүүхдийн тусламжийн 108 утсанд дуудлага өгчээ.

-ХҮЧИРХИЙЛЭГЧ ЭТГЭЭДИЙГ ЦАГДАН ХОРЬЖЭЭ-

Хэрэгт холбогдуулан цагдаагийн байгууллага аавыг нь цагдан хорьж, мөрдөн байцаах ажиллагаа явуулж эхэлжээ. Эх сурвалжийн мэдээлж буйгаар, уг этгээд 30 орчим настай бөгөөд охиноо хүчирхийлээд зогсохгүй эхнэрээ ч байнга хүчирхийлдэг, гэр бүлийн хүчирхийлэл үйлдэгч этгээд байсан байж болзошгүйг цагдаагийн байгууллага баримтжуулан шалгаж буй юм байна.

Бага насны хүүхдүүд хамгийн ойр дотны хүмүүстээ хүчирхийлүүлжээ гэх сэтгэл зүсэм хэргүүд ингэж ойр ойрхон, ар араасаа хөвөрч буй нь туйлын санаа зовоох асуудал болоод байна. Тиймээс энэ асуудлаар холбогдох байгууллагууд эхнээсээ дуугарч, хүүхдийн хүчирхийллийн эсрэг үгээ хэлж, тэмцэж эхлээд буй юм.

Өнөөдөр 11:00 цагт “Зууны мэдээ” үндэсний мэдээллийн төвд “Нүдээ нээ” хүүхэд хүчирхийллийн эсрэг үндэсний хөдөлгөөнийхөн хэвлэлийн бага хурал зарлалаа. Хурлаар эцэг эхчүүд, томчууд биднийг бага насны хүүхдээ энэ мэт харгислалаас хэрхэн хамгаалах талаар соён гэгээрүүлэх мэдээлэл өгөхөөс гадна сүүлийн үед гарсан энэ мэт аймшигт хэргүүдийн талаар мэдээлэл өгөх юм байна.

Б.ЦЭЛМЭГ 

Эх сурвалж: Medee.mn