Ерөнхийлөгчийн сонгуулийн дуулиан шуугиан ёстой л ид дээд цэгтээ тулж байна. МАН-ын 60 тэрбум, АН-ын төмөр замын гэрээ, МАХН-ын 50 сая воннын шуугианаас хальж ор хөнжил рүүгээ хүртэл орцгоож байна. АН-аас нэр дэвшигч Х.Баттулгыг Баянгол дүүргийн иргэдтэй уулзах үеэр гишүүн асан Ц.Оюунгэрэл      Өнөөдөр эрх баригчдын хууль бус үйлдэл, амлалтаасаа ухарсан бодит үнэн хийгээд төр засгаа наймаалцсан талаархи баримт мэдээ мэдээллийг хоёрхон телевиз, хоёрхон сонин олон нийтэд түгээж, үнэний талд зогсч байна. Бусад нь яав. Хагас мянгаар тоологдох бусад хэвлэл мэдээллийн хэрэгсэл яагаад хэт нэг талыг барин ажиллах болов. Ардчиллаас үнэ цэнэтэй юу байдаг болоод ийнхүү хаалтын гэрээгээр амаа таглуулчихав аа. Яагаад бүгдээрээ загас шиг дуугүй сууна вэ. Хоёр удаа дэмжиж гаргасан ардчилсан Ерөнхийлөгч маань юуны учир загас шиг дуугүй сууна вэ” хэмээн хэллээ.

            Үнэхээр үндэсний эв нэгдлийг илэрхийлэгч маань гишүүн асны хэлсэн шиг ёстой л “загас шиг дуугүй” сууна. Уг Ц.Оюунгэрэл Ц.Элбэгдоржийг хүний нутагт зүдрүүхэн явахад нь түшиж тулж байсан ганц хүн нь юм билээ. Тодотгож хэлбэл, 2000 оны сонгуулиар навс ялагдсан АН ялагдахад алсын Америкийг зорьсон хэдэн залуусын нэг нь тэр байсан юм. Тиймээс Ц.Элбэгдорж АНУ-д сурч ахуй цагтаа Ц.Оюунгэрэл болон гэр бүлийн дэмжлэгийг чамгүй хүртсэн нэгэн гэдгийг эх сурвалж хэлдэг. Тийм ч учраас дээрх хоёр эрхэм гайгүй сайн найзууд бөгөөд Ц.Оюунгэрэл Ерөнхийлөгч найздаа ийнхүү гомсоноо иргэдтэй хуваалцжээ.

            Гишүүн асан Ц.Оюунгэрэл дээрх үгсийг хэлэхдээ нэлээд туньсан маягтай байсан бөгөөд энэ тал дээр Ерөнхийлөгчийг татан оролцуулах сонирхолтой байгаа нь цухалзана. Уг нь Үндэсний эв нэгдлийг илэрхийлэгч хүний хувьд эв эеийг хичээсэн үг дуугархад болохгүй зүйл үгүй. Гэтэл Ц.Элбэгдорж Ерөнхийлөгчийн хувьд “Хадны завсар хавчуулагдсан халиуны зулзага хөөрхий” гэгч болоод байгааг эрх биш хаа хаанаа гадарлаж байгаа биз дээ.

А.Бат

Шуурхай.мн