ЛҮНГИЙН ЗАМ ДЭЭР МАШИНАА ЭВДЭЛСЭН ХОХИРОГЧ УИХ-ЫН ГИШҮҮН ДАМБА-ОЧИРЫН “ОЧИР” ТӨВ КОМПАНИЙГ ШҮҮХЭД ӨГЧЭЭ

Улаанбаатар-Эрдэнэсантын чиглэлийн замыг хатуу хучилттай болгон шинэчлэх ажлыг Улсын төсвийн хөрөнгө оруулалтаар хийж,  106,2 км замыг  нь УИХ-ын гишүүн Дамба-Очирын “Очир төв” ХХК  гүйцэтгэх гэрээ байгуулжээ.  Уг гэрээнд барилгын ажлыг ашиглалтад оруулсны дараагийн жилээс эхлэн нэг дэх жил санхүүжилтийн 30 хувийг, 2 дахь жил 30 хувийг, 3 дахь жил үлдэх 40 хувийг барагдуулахаар тохиролцсон байна. Гэвч Дамба-Очир гишүүн барилгын ажлыг дуусаагүй байхад дээрх гэрээгээ  зөрчин,  улсын төсвөөс  2,0 тэрбум авсан ч барилгын ажил удааширч, Лүнгийн зам нэртэй камыг тойрсон хэрүүл маргаан дэгдэх болсныг уншигчид санаж байгаа нь лавтай. Энэ зам ашиглалтад орсон ч Дамба-Очир гишүүний чихнээс байнга хонх уяж, байнга хэл ам татлаж байгаа. Үнэндээ ч Лүнгийн зам дээр машин тэргээ эвдсэн, мөн осол аваар гарч, ам нас эрүүл мэндээрээ хохирсон хүмүүсийн гомдол санал тасрахгүй байгаа юм.

Саяхан л гэхэд Нийслэлийн Сүхбаатар дүүргийн шүүхийн шүүгч С.Буд даргалж, шүүгч В.Жавхлан, С.Базарханд нар УИХ-ын гишүүн Д.Дамба-Очирын “Очиртөв” ХХК-тай холбоотой нэхэмжлэлийг хэлэлцжээ. Хохирогч Баянгол дүүргийн 13-р хорооны иргэн Бадамраагийн Болд тус компаниас гэм хорын хохиролд 9.463.945 төгрөг гаргуулахыг хүсэж шүүхэд гомдол гаргажээ.  Хохирогч залуу   2010.08.21-ний өдрийн 23 цагийн үед 91-99 УНЕ улсын дугаартай Ланд Круйзер 105 маркийн автомашиныг жолоодож явахдаа Төв аймгийн Баянхангай  сумын нутаг дэвсгэрт “Очир төв” ХХК-ий овоолж асгасан хайрган дээгүүр харайлган осолд орж машинаа эвдсэн.

Тиймээс гэм хорын хохиролд 9.317.500 төгрөгийг, Улсын тэмдэгтийн хураамж 146.445 төгрөгний хамт “Очир төв” ХХК-аас гаргуулж өгнө үү гэдэг хүсэлт гаргасан байх юм. Шүүх уг нэхэмжлэлийг хянаж үзээд  “Очир төв” ХХК нь дээрх автомашины эвдрэл хохирлын шууд үнэлгээ болох 7.496.000 төгрөгнөөс урьдчилан олгосон таван булын үнэ болох 700.000 төгрөгийг хасч, 6.796.000 төгрөгийг нэхэмжлэгч Б.Хонгорзул, Б.Болд нарт төлөх шийдвэр гаргажээ. Энэ мэдээлэл олон хүний анхаарлыг татаж байна. Ялангуяа Лүнгийн зам дээр осол аваарт орж, эрүүл мэндээрээ хохирсон, ам насаа алдсан хохирогчдын ар гэрийнхэн холбоо байгуулж, Дамба-Очир гишүүний хувийн компаниас хохирлоо төлүүлэхээр шийдээд байгаа аж. Эрхэм гишүүн Д.Дамба-Очирын “Очир төв” ХХК-ны захирлаар түүний эхнэр Цэгмид гэгч бүсгүй ажиллаж байгаа аж. УИХ-ын гишүүн Лүнгийн зам дээр  эвдэрсэн машины таван булны үнийг төлж өгч байгаа юм чинь энэ замын засвараас болж осолд орсон хүмүүст нөхөн төлбөр өгөх ёстой хэмээн үзэж байгаагаа тэд нуухгүй байна.

www.shudarga.mn