“Сайхны сарлаг 2017” арга хэмжээ Өмнөговь аймгийн Говь гурван сайхан уулын Ёлын аманд энэ сарын 27-нд болохоор болжээ. Үүнийг тус аймгийн ЗДТГ, Хүнс хөдөө аж ахуй, байгаль орчин аялал жуулчлалын газар болон Говь гурван сайхан байгалын цогцолборт газрын хамгаалалтын захиргаа хамтран зохион байгуулж байгаа аж.

Энэ нь говь нутагт сарлаг үржүүлж ирсэн уламжлалыг хадгалж үлдэх, тоо толгойг нь нэмэгдүүлэн өсгөж үржүүлэх, сарлаг үржүүлэгчдийг дэмжин урамшуулах, нийтэд сурталчлах, аялал жуулчлалыг хөгжүүлэх зорилготой аж.

Энэ үеэр сарлаг болон бусад малын сүү цагаан идээ, ноолуурын үзэсгэлэн худалдаа, сарлагчдын уулзалт хэлэлцүүлэг, сарлагийн зан үйлтэй холбоотой буухиа тэмцээн, мөн шилмэл бух, үнээ шалгаруулах, сарлагийн уралдаан зэргийг зохион байгуулах юм байна.