С.Зориг агсны амь насыг хөнөөсөн хэргийн цорын ганц гэрч гэгдэхийн сацуу хэрэгт холбогдон шалгагдаж байсан Б.Булганыг ОХУ-аас орогнол хүсээд байгаа гэх мэдээлэл гарах болов. Сануулахад, Улсын ерөнхий прокурорын туслах, Дотоод хяналт, аюулгүй байдлын хэлтсийн дарга Э.Амарбат С.Зориг агсны амийг хөнөөсөн хэрэгтэй холбоотой мэдээллийг хэвлэлийнхэнд өгөхдөө “С.Зоригийг хөнөөсөн хэрэгт Булганаас гадна нэг бус хүнийг холбогдуулан шалгаж байгаа. Хэрэг нууцын зэрэглэлтэй тул нэмэлт мэдээлэл өгөх боломжгүй. Хэргийн мөрдөн байцаалт дууссан. Удахгүй шүүхэд шилжүүлнэ” хэмээн хэлж байсан. Харин шүүхийн шатанд хэрэг очиход Ц.Амгаланбаатар, Б.Содномдаржаа, Т.Чимгээ нарын үйлдсэн хэрэг болж, хоёр шатны шүүхээс тэдэнд ял оноогоод байгаа юм.

За харин Б.Булганы тухайд уг хэрэгт гэрчээр оролцох хууль зүйн үндэслэлгүй болсон гэдгийг Нийслэлийн прокурорын Мөрдөн байцаах ажиллагаанд хяналт тавих хэлтсийн дарга Ж.Сандагсүрэн хэлсэн билээ. Уг нь Б.Булганы тухайд хэрэгт гэрчээр татагдах бус холбогдуулан шалгагдаж байгаа гэдгийг Э.Амарбат хэлсэн байдгийг эхэнд өгүүлсэн. Тэрчлэн өнгөрсөн 18 жилийн хугацаанд  Монгол Улсаас гарч яваагүй Б.Булган хэрэг илэрсний дараа Монголоос явах болсон нь анхаарал татаж байна.

Эх сурвалж: Шуурхай.мн