Сүхбаатар дүүргийн АН-ын дарга Д.Баттулга  намын дүрмээ  үл тоон Нийслэлийн АН-ын даргад нэр дэвшихээр зүтгэж буй нь намын эгэл жирийн гишүүдийн хувьд тун таагүй санагдаж байгаа аж. Ямартаа л энэ талаарх сэтгэгдлээ сошиалаар илэрхийлцгээж байгаа нь олон байхав. Сануулахад, Нийслэлийн Ардчилсан намын даргад Нийслэлийн АН-ын дарга асан Ш.Түвдэндорж, Нийслэлийн ИТХ-ын дарга асан Д.Баттулга нар өрсөлдөж буй юм.

Харин Д.Баттулгын тухайд  намын дүрэм зөрчин даргад нэр дэвшиж байгааг нь хэвлэлүүд ч бичиж, нийтлэж байгаа юм.  Ардчилсан нам Нийслэлийн ИТХ-д олонх байх хугацаанд Д.Баттулга ИТХ-ын даргаар ажиллаж байсан.  Тэгээд болж өнгөрсөн сонгуульд АН нийслэлд ялагдсан нь Д.Баттулга нарын ажилд иргэд дүн тавьсан хэрэг л дээ.  Уг нь АН-ын  дүрэмд “АН сонгуульд олонх болоогүй тохиолдолд тухайн шатны намын дарга, дэд дарга нар, ХЭГ-ын даргыг огцорсонд тооцно. Түүнээс гадна тухайн үеийн ИТХ-ын дарга, Засаг дарга байсан намын гишүүн нь намын удирдлагын дараагийн сонгуульд нэр дэвших эрхгүй” гэсэн заалт байдаг. Тиймээс ч намын дарга З.Энхболд ялагдлаа хүлээн зөвшөөрч, намын даргын сунгаанд оролцоогүй.  Мөн Ерөнхийлөгчийн сонгуульд ч оролцохгүй гэдгээ мэдэгдсэн. Намын дүрмээ мөрддөг, жинхэнэ намын гишүүн хүн бол ингэж асуудалд ханддаг аж. Харин Д.Баттулгын тухайд эрх мэдэлтэй л байвал, намын дүрэм цаашаа л гэж байх шив.

Эх сурвалж: Шуурхай.мн