Цэнхэр үст Э.Цэрэндолгор болон Б.Насанбаяр нарын хооронд үүссэн асуудал шийдэгдсэн бололтой. Э.Цэрэндолгор өөрийн цахим хуудсаараа дамжуулан Б.Насанбаярыг Мүүний гаж урсгалыг Монголд дэлгэрүүлж, хүүхэд залуусыг гаж буруу зүйлд  уриалан дуудаж байна хэмээн бичиж, нийтлэж байсан. За харин  Б.Насанбаяр нэр төрөө сэргээлгэхээр өнгөрсөн жил шүүхэд хандаад байсан бол нэхэмжлэлийг Баянзүрх дүүргийн шүүх буцаажээ. Тодруулбал, нэхэмжлэгч Б.Насанбаяр болон түүний итгэмжлэн төлөөлөгч шүүх хуралд ирээгүй тул  иргэн Э.Цэрэндолгорын эсрэг үүсгэсэн иргэн, хувь хүнтэй холбоотой хэргийг нэхэмжлэгч өөрөө дэмжихгүй байна гэх үндэслэлээр хэрэгсэхгүй болгосон юм байна.

Б.Насанбаярын тухайд МУБИС-ийн Зайны сургалтын төвийн эрхлэгчээр ажиллаж буй. Тэрбээр сүүлд хэвлэлд ярихдаа “Өнгөрсөн онд намайг арван үндэслэлээр АТГ, ТЕГ-аар шалгуулна гэж тэр хүн олон нийтэд айдас төрүүлэм их л сүртэй юм ярьж байсныг та санаж байгаа байх. Энэ сүржин мэдээлэл гүтгэлэг байсан гэдгийг олон нийт одоо ойлгож авсан болов уу. Тухайн үед хөтөлбөр, сурах бичиг боловсруулсан эрдэмтэд маань хэвлэлийн хурал хийж тэр хүний ярьсан бүхэн ор үндэсгүй гэж няцааж байсан. Гэсэн хэдий ч тэр хүн хүсэлт гаргасан учраас холбогдох байгууллага нь шалгасан. Хэрэг хийгээгүй байж шалгаж мөрдүүлэх хэцүү ч гэлээ нөгөө талаар “Гэм буруугүй” гэсэн дүн нь намайг хэн бэ гэдгийг бусдад харуулсан байх. Өнгөрсөн оны гуравдугаар сард миний нэр төрд халдсан гэсэн үндэслэлээр би шүүхэд хандсан. Одоо хүртэл шүүх хурал янз бүрийн шалтгаанаар хойшилсоор л байна.” хэмээн ярьсан байдаг. Гэтэл бодит байдал дээр  тэр өөрөө шүүх хуралд очоогүй гэх мэдээлэл ийнхүү анхаарал татаж эхэллээ.

Эх сурвалж: Шуурхай.мн