Манай Сангийн сайдын  ам нь ажлаасаа түрүүлчихээд байдаг гэмтэй. Сайд болонгуутаа л улсаа өрөн доороос өндийхөд хэцүү боллоо гэж дэлхий даяар цацсан хүн л дээ. Тэгвэл сайд нь маань энэ оны сүүл гэхэд бүх л салбар гайгүй болчихно гэж том дуугарчээ. Хэрэвзээ оны сүүл гэхэд энэ л янзаараа байвал, эргээд Сангийн сайдаас ам асуух хэрэг гарч таарах нь.  Б.Чойжилсүрэн сайд хэлэхдээ “Ер нь он дуустал хэсэг хугацаанд бүсээ чангалах бодлого барина. Оны төгсгөлд бүх салбарын асуудал гайгүй болоод ирнэ. Валютын урсгал ч гайгүй болно. Энэ нь мэдрэгдэх байх. Энэ жил нэг тэрбум орчим ам.долларын төсвийн алдагдлыг ОУВС-гийн өөрийнх нь хоёр хувиас доошгүй хөнгөлөлттэй зээлээр санхүүжүүлнэ.” хэмээн ярьжээ. Тэгэхээр Сангийн сайдын хэлснээр Монголчууд бид энэ оныг дуустал л бүсээ чангалчихвал болчих бололтой. Ирэх онд бол яадаг ч байсан бүсээ чангалахгүй шүү гэж сайдад тулгах бүрэн эрхтэй юм байна, бид.

Сангийн сайд хэвлэлд өгсөн ярилцлагадаа “ОУВС-ийн хөтөлбөрт хамрагдах талаар “Тодорхой долоон төрлийн татвар нэмэхээр байгаа. Үүнийг хэрэгжүүлэхгүйгээр ОУВС-гийн хөтөлбөр хэрэгжихгүй. 2018 оны нэгдүгээр сарын 1-нээс хадгаламжийн хүүгээс татвар авах байсныг 2017 оны дөрөвдүгээр сарын нэгэн болгож урагшлуулах шийдвэр гарсан. Хадгаламжийн хүүнээс татвар авахад ямар нэг хязгаарлалт хийхгүй. Орлого зарлагын баланс алдагдсан байна. Бусад улс оронд орлого зарлага нь тэнцүү байдаг. Орлогоосоо зарлага нь даваад байхаар өрийн таазаасаа даваад явчихаж байгаа юм. ОУВС-гаас зорилтот хөтөлбөрөө нийгмийн халамжид чиглүүл гэж байгаа. Тиймээс “Цалинтай ээж”, Насны хишиг” хэрэгжээд явж байна. Хүүхдийн мөнгийг 60 хувьд биш 40 хувь болох зорилтот бүлэгт өг. Үлдсэн 20 хувийг нь буцаагаад эмзэг бүлгийн хүүхдүүдэд хоолны талон болгож олго гэж байгаа. Долоодугаар сарын 01-ээс л шатахууны онцгой албан татвар нэмэгдэнэ. Бусад улс оронд онцгой албан татвар нь ДНБ-ийхээ найман хувь хүртэл өндөр байдаг. Гэтэл манайд хоёр хувь ч хүрэхгүй байгаа шүү дээ.” хэмээн ярьжээ.

Тэгэхээр сайдын хэлж байгаагаар бол бид сүржигнээд байлгүй, дуугай л бүсээ чангалаад он дуустал хүлээх ёстой гэж ойлгогдож байна.  За тэгээд сайд яахав, ингэж ярьдаг л юм байгаа биз.Гол нь иргэдийн амьдрал дээр л бодит ахиц гарах ёстой л доо.

Манай сангийн сайд шоудаж ярьдаг биш хийдэг байх хэрэгтэй л дээ. Эдийн засагч Н.Дашзэвэг “Сангийн сайд ханшаа, улмаар эдийн засгаа, улсаа ард түмнээ хорлочихлоо. Төсвийн алдагдал, төсвийн санхүүжилт бол инфляци, ханшаа хөөрөгдөх нэг том хүчин зүйлс мөн л дөө. Энэ тал дээл Сангийн яам муу ажиллаж байна. Бусад оронд Төвбанк, Сангийн сайд нь ингэж мэдэгдсэн бол шууд огцруулна. Улс төрийн соёлтой оронд бол өөрсдөө сайн дураараа огцорно гэж том асуудал бий” гэж хэлээд авсан удаатай.  Үнэхээр ч тэрбээр Сангийн сайдын сандалд суугаад удаагүй байхдаа Монгол Улс тун хүнд байдалд орлоо хэмээн зарлаж, баахан статистик мэдээллийг олон улс даяар цацсан хүн бол Б.Чойжилсүрэн. Яахаараа ч тийм бодлогогүй байдаг юм. Тиймээс ч Сангийн сайд маань хаана юу ярьчих бол гэх битүүхэн айдастай шахуу байдаг болчихож гэхэд эмгэнэлийн шинжтэй хошигнол шиг л тархинд бууж байх жишээтэй. Ямар ч байсан олон улсын үнэлгээний байгууллагууд манай улсын зээлжих зэрэглэлийг буулгахад Сангийн сайдын цацсан мэдээллүүд нөлөөлсөн гэж ойлгогддог.

Тэгвэл одоо нөгөө Сангийн сайд маань он дуустал л бүсээ чангал гэж байна. Он дууссан хойно бол бүсээ чангалахгүй шүү гэдгээ Монголчууд түүнд хандаж хэлэх эрхтэй шүү!

Эх сурвалж: Шуурхай.мн