Ерөнхий сайд асан Н.Алтанхуяг өнөөдөр өглөө АТГ-т байцаалт өгч байна. Мөрдөн байцаалтын хүрээнд  түүний  эзэмшлийн “Хаан жимст”, “Max export” компаниудад нэгжлэг хийжээ.

Түүнийг хууль бус тендерийн хэргүүдэд АТГ-аас шалгаж байна. Тодруулбал, 2012 онд БСШУЯ-наас зарласан Сонгинохайрхан дүүргийн 11 цэцэрлэгийн гаднахыг тохижуулах тендер, Нийслэлийн ЗДТГ-аас зарласан, мөн дүүргийн XIII хорооны IX байрны гаднах талбайг тохижуулах тендер, тус дүүргийн Тамгын газраас зарласан 19 байршил дахь гадна талбайг тохижуулах тендер зэрэг нийт дүнгээр дөрвөн тэрбум гаруй төгрөгийн үнэ бүхий тендерт “Алтан тэнгэр”, “Ар дааган” ХХК зэрэг хэд хэдэн аж ахуйн нэгж хууль бусаар шалгарсан гэж АТГ үзэж буй юм. Харин эдгээр  тендерийн ард Ерөнхий сайд асан Н.Алтанхуягийг байгаа гэж үзэж буй аж. Мэдээллээс үзэхэд “Ар дааган” ХХК-ий ерөнхий инженер нь Н.Алтанхуягийн том охиных нь нөхөр, “Алтан тэнгэр” ХХК-ий захирал нь  төрсөн эгчийнх нь хүүхэд гэх мэдээлэл байгаа юм. Н.Алтанхуягийн төрсөн эгчийн хүүхэд болон бусад хүний хувийн харилцах дансанд тендерийн санхүүжилтийн мөнгөний зарим нь шилжсэн гэдгийг Улсын Ерөнхий прокурорын газраас мэдээлж байсан юм.