Ардчилсан намынхан шинэ даргаа сонголоо. Энэ удаагийн дарга олонх гишүүнийхээ саналаар сонгогдсоноороо онцлог. Өөрөөр хэлбэл, орон даяар сонгууль явуулж Ардчилсан намын гишүүд С.Эрдэнийг даргаараа сонголоо. С.Эрдэнэ бусад нэр дэвшигчдээс хол илүү оноогоор ялсныг Ардчилсан намын дарга З.Энхболд албан ёсоор зарласан. Тэгэхдээ “Ирэх сонгуулиудад ялуулах үүргийг Ардчилсан намын гишүүд С.Эрдэнэд хүлээлгээлээ” гэж тодорхой хэлсэн билээ.

АН-ын шинэ дарга С.Эрдэнэ “Хамт өрсөлдсөн дөрвөн нөхөртөө баярлалаа. Бид таван тийшээ салаагүй. Нэгэн үзүүрт зүтгэж ирсэн. Бид тавын хэн ч ялсан бусад нь дэмжиж ажиллана гэсэн зарчимд нэгдсэн байсан” хэмээн ялсан ч ялагдсан ч хэн хэн нь нэгнээ дэмжиж ажиллахаа амласан тухай өгүүлсэн юм.  Үнэхээр ч Ардчилсан намын даргад нэр дэвшигч таван нөхөр хамтдаа, 40 хоногийн турш хөдөө хээр явж, намынхаа гишүүн нэр бүртэй уулзсан. Тэдний мөрийн хөтөлбөр нь өөр боловч, зорилго нь Ардчилсан намыг хүчирхэгжүүлэх билээ. Эцэст нь тэдний ярьсан, амласныг сонссон гишүүд нь С.Эрдэнэд итгэл хүлээлгэсэн нь үнэн. Удахгүй болох их хурлаараа Ардчилсан нам шинэ даргаа батламжилна.

Үүнтэй зэрэгцэн намын даргын сонгуулийг луйвардсан, мөнгө тараасан гэх зэрэг яриа гарч байна. Өөрөөр хэлбэл, ялагдсан зарим нөхдийн хар PR үргэлжилсээр байгаа юм. Зарим гэхийн учир нь Ж.Батзандан л иргэд, гишүүдээ хүндэтгэн улс төрийн соёл гаргаж, “Ялалт байгуулсан С.Эрдэнэ гишүүнийг хүлээн зөвшөөрч байна. Хэлсэн амласан ёсоороо түүнийг дэмжиж ажиллана” гэсэн юм. Ж.Батзанданг нам дотроо гадуурхаж, гудамжны улс төрч хэмээн цоллодог. Гэвч тэрбээр харин ч Ерөнхий сайд, сайд хийж байсан эрхмүүдээс илүүтэй улстөрийн соёл гаргаж чадлаа.

Л.Гантөмөр, Н.Алтанхуяг, Д.Эрдэнэбат нарын хувьд улстөрд олон ажил ажиллаж, гишүүнээс эхлээд төрийн сайд хүртэл хийж явсан. Ялагдаж, ялж сурсан зангарагтай улстөрчдийн тоонд ордог эрхмүүд. Гэтэл АН-ын даргын сонгуулийн дүнг хүлээн зөвшөөрч чадахгүй, хэлсэн ярьснаасаа буцан дэндүү увайгүй зан гаргаж байна. Тэдний энэ явуургүй, башир арга өөрсдөд нь ашиггүйгээс гадна намд нь хортой. Ардчилсан нам эв түнжигүйгээсээ болж өнгөрсөн хугацаанд багагүй хохирол амссан. Ирэх жилүүдэд атгасан гар шиг байж чадахгүй бол ялагдлын мэдээ энэ намыг өндийлгөхгүй л болов уу. Тиймээс Ардчилсан намынхан ялагдсан нэр дэвшигчдээс улс төрийн соёл нэхье. Ирэх сонгуулиудад ялуулах үүргийг С.Эрдэнэд өгсөн бол уначихаад уйлдаг уйваагүй нөхөддөө бас сануулга өгөх нь зөв биз ээ, Ардчилсан намынхаан.