Утаа, агаарын бохирдлыг битгий улстөржүүл гэсэн мессэж улстөрчдөөс гарч байгаа. Үнэндээ аргаа барсан иргэдийн хувьд жагсаж тэмцээд ч болов утаагүй Улаанбаатартай болох мөрөөдөлдөө ойртох гэж ядаж байна. Оны өмнө Утааны эсрэг эцэг эхчүүдийн жагсаал болсон. Тэгвэл өнөөдөр утааны эсрэг “Боож үхлээ!” жагсаал болж байна.  Олон ээж аавууд “Үр удмаа утаанаас аваръя”, “Ээждээ тэврүүлмээр байна”, “Биднийг авраач” хэмээн бичсэн  зурагт хуудас, бичиг барьж тэмцлээ илэрхийлж байна.

Өнөөдрийн энэ жагсаалын үеэр төрийн гурван өндөрлөгт хүргэсэн шаардлагыг уншиж танилцуулж, аав, ээжүүд  эрх баригчдаас даруйхан тодорхой шаардлагатай арга хэмжээ авахыг шаардаж буйгаа илэрхийлж байна. Жагсаалын төгсгөлд Засгийн газрын ордонг тойрч, утааны хор уршгийг харуулах үүднээс шар болно хар өнгийн шаарыг Төрийн ордны хашаанд өлгөнө гэдгээ аав ээжүүд мэдэгдсэн юм.

Утааны эсрэг жагсаалыг зохион байгуулагчдын нэг О.Ундрам  гэж эмэгтэы  сэтгэл сэртхийлгэм тоо баримтыг дурдаж байсныг эргэн сануулъя. Тэрбээр “Хувиараа судлаж үзэхэд жилд 40 мянга гаруй хүүхэд ханиад хүрч, хатгаа болдог юм байна. Энэ жил 0-1 настай 505 хүүхэд энэ өвчнөөс болж нас барсан байхад өнгөрсөн жил 475 хүүхэд өөд болсон тоо баримтыг олж үзсэн. Харин 1-5 настай 100-200 хүүхэд жил бүр мөн л энэ шалтгаанаас болж амиа алдаж байна. Үнэхээр агаарын бохирдол хүүхдийн уушгинд дархлаа тогтоохоо больж, хүүхдүүд ханиаднаас, эмнэлгээс, эм эмчилгээнээс салахаа болилоо” хэмээн  хэвлэлд ярьсан байсан.

Тиймээс ч ээж аавууд “Бидэнд эм тариа биш эрүүл агаар хэрэгтэй” хэмээн жагсаж байна.

Эх сурвалж: Шуурхай.мн