УИХ-д улиран сууж байгаа С.Эрдэнэ сайдын албыг хашихдаа саар олон мэдээлэлд холбогдсон. Түүнийг сайдаар ажиллаж байх хугацаанд нийгмийн даатгалын салбарынхан хууль журам гээчийг утгаар нь гишгэлж, нас барагсдын нэрээр тэрбум тэрбумаар нь тэтгэвэр шилжүүлж, улсад их хэмжээний хохирол учруулсан ч уснаас хуурай гарцгаасан. Ядаж байхад С.Эрдэнэ ч олон асуудалд нэр холбогддог ч хуурай гарчихдаг нэгэн. Тиймээс ч хэрэг явдлыг С.Эрдэнийн нөлөөтэй холбон харах хэсэг нийгэмд байгаа нь үнэн. Өдгөө С.Эрдэнэ АН-ын дарга болохоор улайрч явна. Ичих булчирхай гэж байдаг бол больчихоосой доо гэж хэлэгсэд олон байгаа. Гэсэн ч нэгэнтээ эрх мэдлийн амтыг бал бурам гэж андуурсан хүмүүс тийм ч амар эргэж буцахгүй биз ээ. Түүнчлэн сошиал сайтуудаар С.Эрдэнийн эсрэг байр суурийг илэрхийлж байгаа иргэд цөөнгүй байна. Тодруулбал, “Цензургүй яриа” нэвтрүүлэгт орж байсан Багтай хүн гэдэг нэртэй фэйсбүүк хэрэглэгч өөрийн хуудаснаа “ Жирийн алба хашиж байгаагүй, Зөөлөвчгүй сандалд сууж үзээгүй С.Эрдэнэ 2004 онд Улсын Нийгмийн Даатгалын Ерөнхий Газрын дарга байхдаа “Боловсролын тэргүүний ажилтан” болж байсныг онцлон өгүүлжээ.

УИХ дахь АН-ын бүлгээ ахлаж байгаа түүнийг намаа удирдаад аваад явах хэмжээний ёсзүйтэй хүн мөн үү гэдэг дээр янз бүрийн л байр сууриуд яригдаж эхлээд багагүй хугацаа өнгөрч буй.  Баабар нэгэнтээ түүний талаар хатуухан үгс хэлсэн нь сошиалаар ч нэлээд өндөр авсан харагдана лээ. Чухам тэгээд АН-ынхан булт олноороо хэлэлцэж байгаад шийдвэрээ гаргах нь дамжиггүй. Ер нь бол С.Эрдэнэ гишүүний тухайд өнгөрсөн хугацаанд чамгүй асуудлуудад нэр холбогдож ирснийг тодотгоё.

Эх сурвалж: Шуурхай.мн