Б.ТУУЛ

МЗЭ-ээс жил бүр уламжлал болгон зохиодог яруу найргийн “Болор цом” наадмын бүртгэл өнгөрсөн баасан гаригт эхэлжээ. Энэ жил 34 дэх жилтэйгээ золгож буй уг уралдааны бүртгэл сарын турш үргэлжлэх бөгөөд ирэх сарын 20-ны өдөр дуусах юм байна. Энэ жилийн хувьд, “Болорцом” наадам ирэх сарын 28-ны өдөр Дорнод аймгийн төв Чойбалсан хотод зохион байгуулагдахаар тов тогтсон. “Болор цом” наадам 2005 онд анх хөдөө орон нутагт зохион байгуулагдах болсноос хойш зургаа дахь аймагтаа болох гэж байгаа нь энэ ажээ. Өмнө нь Эрдэнэт, Дархан болон Архангай, Өвөрхангай, Төв аймгуудад “Болор цом” наадам тайзаа засч байсан. Энэ жилийн “Болор цом” наадмыг Завхан аймагт болно гэсэн яриа гарч байсан ч Дорнод аймагт зохион байгуулагдах нь тодорхой болжээ.