С.Эрдэнэ гишүүн АН-ын даргын суудалд сууж магадгүй гэх бор шувуу  сонгууль өнгөрөөд л ниссэн л дээ. Тэгсэн бор шувууны үүр хаанаас эхтэй нь нэгэнтээ тодорхой болсон. Одоогийн дарга Зи-гээс багц сум авч, атгасан С.Эрдэнэ АН-ын даргын төлөө энэ өдрүүдэд өрсөлдөж байна. УИХ дахь АН-ын бүлгээ ахлаж байгаа түүнийг намаа удирдаад аваад явах хэмжээний ёсзүйтэй хүн мөн үү гэдэг дээр янз бүрийн л байр сууриуд яригдаж эхлээд багагүй хугацаа өнгөрч буй.  Баабар нэгэнтээ түүний талаар хатуухан үгс хэлсэн нь сошиалаар ч нэлээд өндөр авсан харагдана лээ. Чухам тэгээд АН-ынхан булт олноороо хэлэлцэж байгаад шийдвэрээ гаргах нь дамжиггүй. Ер нь бол С.Эрдэнэ гишүүний тухайд өнгөрсөн хугацаанд чамгүй асуудлуудад нэр холбогдож ирсэн гэхэд болно. Тэрчлэн өнгөрсөн дөрвөн жилийн хугацаанд нэг асуудал дээр байр суурь нь 360 градус эргэсэн нь хэвлэлийнхний анхаарлын гадаа үлдсэнгүй ээ. Тэр нь юу гэхээр иргэдээс “Эрдэнэс Тавантолгой”-н хувьцааг худалдаж авахыг боловсон дээрэм гэж үзэж байгаагаа хэвлэлээр дамжуулан хэлж ярьдаг байсан тэрбээр сая сонгуулийн өмнө Засгийн газар иргэдээс хувьцааг нь худалдаж авах үйл ажиллагаа явуулахад сайдын хувиар үйл хэргээрээ оролцож байгаа харагдсан билээ. Ингээд илүү олныг нуршилгүйгээр С.Эрдэнэ юу өгүүлж байсныг эргэн сануулъя.

2012 оны 12 сарын 26-нд news.mn news.mn сайтад    “С.Эрдэнэ: Дээрмийн ажиллагаа явуулахгүй” гэсэн гарчигтай тодруулга нийтлэгдсэн байдаг. Тэрхүү тодруулгад сэтгүүлчийн зүгээс С.Эрдэнэд хандаж  “-Хувьцаагаа мөнгөжүүлж нэг сая төгрөгийн мөнгөн хэлбэрээр авах хүсэлт гаргасан иргэд олон бий. Тэдэнд мөнгийг нь хэзээнээс олгох юм бэ?” гэсэн асуулт тавьсан байдаг. Харин С.Эрдэнэ:

-Энэ мөнгийг Шинэчлэлийн Засгийн газар олгохгүй, түрүүчийн Засгийн газрын бодлогыг буруу гэж дүгнэж байгаа. Ялангуяа би гишүүн байхдаа түрүүчийн Засгийн газрын сая төгрөгөөр хувьцаа худалдаж авахыг боловсон дээрэм гэж нэрлэж байсан. Тиймээс боловсон дээрмийн ажиллагааг бид зогсооно. Та бүхэн мэднэ. Хөрөнгийн бирж дээр хувьцааг эрэлт нийлүүлэлтээр тодорхойлдог болохоос биш манайх шиг Засгийн газар нь хувьцааны үнийг тогтоодог улс байхгүй. Хувьцаа бол арилжааны хэрэгсэл шүү дээ. 1990 онд цэнхэр ягаан тасалбарыг тухайн үеийн нөхдүүдийн зохион байгуулалттайгаар хийсэн ажиллагаагаар шил архи, гарын савангаар дээрэмдээд авсан. Түүний уршгаар цөөн тооны нөхдүүд хагартлаа баяжаад дийлэнх нь хувьцааны үр дүнг үзэж чадаагүй. Ухаа худаг Энержи ресурсын нэгж хувьцааны үнэ хамгийн багадаа 4000 төгрөг байгаа. Тэгэхээр нэг хүнд ногдох 1072 ширхэг хувьцаа чинь хэрвээ Хонконгийн хөрөнгийн бирж дээр гаргаад хамгийн бага үнээр тооцоход дөрвөн сая төгрөг, дөрвөн ам бүлтэй айлын хувьцаа 16 сая төгрөг болно. Гэтэл үүнийг дөрөвхөн сая төгрөгөөр авах гэж байсан. Энэ бол дээрмийн үйл ажиллагаа. Энэ бол иргэдээр дамжуулж Тавантолгойг булааж авах гэсэн бодлого. Тийм учраас ийм бусармаг ажиллагаа явуулахгүй. Харин энэ Засгийн газраас хийх гэж байгаа ажил бол Тавантолгойн IPO-г яаралтай хийж хувьцааг олон улсын хөрөнгийн бирж дээр гаргах хэрэгтэй. Хувьцаа арилжаанд ороод ирэхээд хувьцааны үнэ зах зээлийн жамаар тогтоно. Тэр үед нь зах зээлийн жамаар хөрөнгийн биржийн үйл ажиллагаагаар дамжуулж иргэд өөрсдөө хувьцаагаа борлуулах ажиллагаанд орох нь илүү өгөөжтэй.”  хэмээн хэлж байсан байх юм.

Тэгвэл С.Эрдэнэ гишүүн сонгуулийн өмнө буюу  2016 оны 6 дугаар сарын 10-ны өдөрхэвлэлийнхэнд  Хүн амын хөгжил, нийгмийн хамгааллын сайдын хувиар мэдээлэл хийх үеэрээ  “Иргэд хувьцаагаа худалдахын тулд өөрийн биеэр бичиг баримттайгаа ирж, маягт бөглөн, гарын үсэг зурах учиртай. Хувьцаагаа зарах хүсэлт гаргаснаас нь хойш долоо хоногийн дараа тухайн иргэний дансанд мөнгийг нь шилжүүлнэ. 1072 хувьцааны 30 хувийнх нь үнэ болох 300 мянгыг иргэдэд гурав хуваан олгоно.” хэмээн өөрийнхөө амаар хэлсэн байдаг.

Тэгэхээр эдгээр мэдээллээс харахад С.Эрдэнэ гишүүн хэлж ярьснаа умартчихдаг бололтой юм. Ирээдүйн АН-ыг Монголын төлөө өндөрт өргөх хүн хэн байх вэ гэдэг асуулт нэхсэн өдрүүд үргэлжилж байна.

Эх сурвалж: Шуурхай.мн