Баянзүрх дүүргийн ИТХ-ынхан хэвлэл мэдээллийнхэнд хандаж мэдээлэл хийлээ. Сонгуулийн ерөнхий хороо болон нийслэлийн сонгуулийн хорооны албан ёсны дүнгээр 41 мандаттай тус дүүрэгт АН 22, МАН 19 авсан байна. Орон нутгийн сонгуулийн үр дүнг хүлээн зөвшөөрөхгүй байгаа хотын даргын энэ үйлдлээс болж Баянзүрх дүүргийн үйл ажиллагаа доголдоход хүрсэн. Тус дүүргийн Засаг даргыг өнөөдрийг хүртэл томилохгүй байгаа нь төрийн үйл ажиллагаанд хүндрэл учруулаад зогсохгүй 1300 гаруй төрийн албан хаагч цалингүй болох хэмжээнд хүрээд байна. Мөн тус дүүрэг хог шороогоо ачих төсөв мөнгөгүй, цас мөс цэвэрлэх ажилтангүй болж, олон иргэний эрх ашиг зөрчигдөхөд ойрхон болсон төдийгүй ирэх оны төсвөө баталж чадахгүйд хүрчээ.

Баянзүрх дүүргийн ИТХ-ын анхдугаар хуралдаан 53.7, хоёрдугаар хуралдаан 90.2 хувийн ирцтэйгээр хуралдаж шийдвэрээ гарган хотын даргад удаа дараа хүргүүлсэн аж. Гэтэл орон нутгийн өөрөө удирдах байгууллагын эрх хэмжээг үл хүндэтгэн дүүргийн Засаг даргыг томилох үүргээ биелүүлээгүй нийслэлийн Засаг дарга бөгөөд Улаанбаатар хотын захирагч С.Батболдыг хуульд заасан үүргээ биелүүлээгүй үндэслэлээр шүүхэд өгөхөөр болжээ.

Тус дүүргийн ИТХ-ын дарга Ш.Ганчимэг “Хан-Уул дүүрэгт гурван суудлын илүүгээр МАН олонх болоход Засаг даргыг нь хоёр хоногийн дотор баталсан. Гэтэл гурван суудлын илүүгээр Баянзүрх дүүрэгт АН ялалт байгуулсан байхад дүүргийн Засаг даргыг томилж, төрийн байгууллагын үйл ажиллагааг хэвийн явуулах боломжийг олгохгүй байна. Өөрөөр хэлбэл, сонгууль дууссанаас хойш 40 хоног өнгөрч байхад хотын дарга хууль, шүүхийн байгууллагын шийдвэрийг үл хүндэтгэн Баянзүрхчүүдийн сонголтыг уландаа гишгэж байгаа нь улстөржсөн явдал хэмээн үзэж байна” гэв.

Эх сурвалж www.polit.mn