Ерөнхий сайд асан Н.Алтанхуягийн хэлж яриад байгаачлан үнэхээр Ерөнхийлөгч Ц.Элбэгдоржийн бүлэглэлийн дарангуйлал дор Монголын улстөр оршин тогтнож байгаа юу гэдэг асуудал анхаарал татаж байгаа юм. Экс Ерөнхий сайд Н.Алтанхуягийг Авлигатай тэмцэх газраас дуудан, эрүүгийн 201501000009 дугаарт хэрэгт сэжигтнээр тооцон мэдүүлэг аваад байна.  АТГ-ын Мөрдөн шалгах хэлтсийн ахлах мөрдөн байцаагч, ахлах комиссар Д.Золжаргал нар Н.Алтанхуягийг  байцаасан бөгөөд мөрдөн байцаах ажиллагаа 16:40-20:00 цагийн хооронд үргэлжиллээ. Тэрбээр байцаалт өгөхөөсөө өмнө хэвлэлийнхэнд өөрийн байр сууриа илэрхийлж байсан. Харин байцаалтаас гарч ирээд тэрбээр ямар нэг юм ярихаас татгалзаж байлаа. Тэрбээр байцаалт өгөхөөр орохоосоо өмнө хэвлэлийнхэнд  “Монголын нийгэмд болж бүтэхгүй байгаа зүйлийг хэлж, Монголын цөөхөн баячууд Монголын хамаг баялгийг сорчлоод авчихлаа, үүнд  нэрийг дурдсан. Түүнээс болж өөрөө дуудагдаж ирж байх шиг байна. Тавантолгой, “Оюутолгой”, “Эрдэнэт”, “Саусгоби” гээд баахан хөрөнгө мөнгө цөөхөн хүмүүс завшаад байна гээд хэлчихсэн чинь манай Ц.Элбэгдорж, тэдний бүлэглэл амь тавьж байгаа юм шиг байна. Цөөхөн хоногт гурав дөрвөн эмэгтэй хүнийг шоронд хийлээ. Тэгээд өнөөдөр намайг ир гэсэн дагуу ирлээ. Ер нь манай Ерөнхийлөгч ба тэдний бүлэглэлийн бий болгочихсон хууль хяналтын байгууллага дотор нэг хонгил байдаг гэж би дөрөвдүгээр сард хэлсэн. Тэр хонгил руу намайг шахаж оруулах гэж олон жил оролдож байна. Намайг Ерөнхий сайд байхаас эхлээд элдэв худал юмаар зохиомол элдэв хэрэг үүсгэсэн” гэж хэлсэн юм. Мөн тэрбээр Ерөнхийлөгч бид хэд 1990 оноос эхэлж ардчиллын төлөө явж ирсэн. Ц.Элбэгдоржийн үгэнд заавал орох ёстой. Орохгүй бол шоронд хийдэг хоёр сонголттой ардчиллын төлөө би зүтгээгүй юм шүү. Ц.Элбэгдоржийн үгэнд ч ормооргүй байна гэж байгаа юм.

Ямартай ч Н.Алтанхуягийг байцаалт өгч байх үед төрсөн дүү Н.Наранцэцэг нь суллагдсан байгаа.  Цагдан хорих, таслан сэргийлэх арга хэмжээний хугацаа нь өчигдөр дууссан тул дүү Н.Наранцэцэгийг нь хорих ангиас сулласан байгаа юм.

Н.Алтанхуяг  “Монголын төрд ажиллаж байсан Ерөнхий сайд хүний хувьд хэлэх юм гэж байна хэлэхгүй юм гэж байна. Би хэлэхгүй юмаа бол хэлэхгүй байгаа шүү. Гэхдээ надад дахиад хэлэх юм маш их байгаа… Би эд нарт нэг юм хэлье. Та нар асуух юм байвал олон нийтийн өмнө суулгаж байгаад асуугаач. Та нар хулгай хийж байгаа юм шиг тэнд байгаа нэг эмэгтэйг шоронд хийгээд, тэнд байгаа нэг ээжийг шоронд хийчихээд гутаан доромжлоод байдаг байхгүй юу.” гэлээ. Мөн тэрбээр  “Манай засгийн газрыг огцруулах болсон нь давхар дээл гэдэг зүйлийг оруулж ирснээс болсон. Би Ерөнхийлөгчид хэлж байсан. Та энэ давхар дээлээ оруулж ирж яах юм бэ бид нар ажлаа хиймээр байна гэж хэлж байсан. Дараа нь давхар дээлийн хуулийг ярьж байгаад байнгын хорооны хурал дээр би бас дургүйцлээ илэрхийлж байсан. Энэ давхар дээлийн хуулийг буцаая аа. Одоо ажлаа хийе юун давхар дээл вэ гээд буцааж байсан. Тэгэхэд их хурлын гишүүд кнопоо дарж чаддаггүй юм байна гэдгийг байнгын хорооны хурал дээр харсан. Тэнд нэг гишүүн орж ирээд кнопоо дарсан бол бид нар олонхи болох байсан юм. Тэр гишүүн орж ирээгүй. Би хожим хойно нь та яагаад орж ирээгүй юм гэхэд маш хүнд байдал надад тохиолдсон уучлаарай гэж байсан. Тодруулаад асуусан чинь нэг дүүг нь шоронд хийчихсэн байсан тэр үед бол гарчихсан байсан. Тэгээд дахиад кноп дарвал дүүг нь дахиад шоронд хийх ийм нөхцөл байдал үүсчихсэн байсан юм байна лээ.”хэмээн хэлж яриад байгаа юм.

Өчигдөр түүнийг сэжигтнээр тооцогдон, байцаалт өгөхөөр ирэх үед УИХ-ын гишүүн Д.Эрдэнэбат тус газарт мөн ирсэн байсан. Тэрбээр  “Би өөрийгөө Ардчилсан намыг төлөөлөх бүрэн эрхтэй гэж бодож байгаа. Ардчилсан намын гишүүний хувьд ч, УИХ-ын гишүүний хувьд, хамтран ажилласан журмын нөхрийн хувьд ч тэр энэ хүний асуудлыг тодорхой болгох зайлшгүй шаардлагатай гэж харж байгаа. Тиймээс АТГ дээр ирж байцаагчтай нь уулзаж Н.Алтанхуягийг ямар үндэслэлээр  шалгах гэж буйг мэдэх хүсэлт тавьсан ч харамсалтай нь хүсэлтийг хүлээж авсангүй. Энэ ганцхан нэг хүний асуудал биш юм. Ардчилсан нам өөрийн гишүүнийг өмгөөлөх ёстой. Тэр байр суурин дээрээ би асуудлыг тодруулах үүрэгтэй, ийм эрхтэй ч гэж бодож ирсэн юм” гэж байсан.

Ямартай ч Н.Алтанхуяг анхны байцаалтаа өглөө. Гэхдээ тэрбээр өмнөх шигээ хэвлэлийнхэнд шулуухан байр сууриа илэрхийлсэнгүй, байцаалтын дараа. Н.Алтанхуягийн хэлсэнчлэн Ц.Элбэгдоржийн бүлэглэл Н.Алтанхуягийн амийг хамхиулах уу гэдэг асуулт анхаарал татаж байгаа юм.

Өнгөрсөн дөрөвдүгээр сард  Н.Алтанхуяг   Ерөнхийлөгч Ц.Элбэгдоржийн эсрэг мэдэгдэл хийсэн билээ. Тэрээр “Ардчилсан намын хийсэн бүтээсэн бүхнийг харлуулж, энэ нам дотроо хагаралдаж байдаг гэдгийг зориуд зохион байгуулсаар байна. Энэ бүхнийг удирдан зохион байгуулж байгаа хүмүүсийн нэгийг өнөөдөр нэр цохон хэлэхээс өөр аргагүй боллоо. Хэдийгээр хүн бүхэн мэдэж байгаа ч хэн ч тэр хүнийг зориглон нэрлэж чаддаггүй. Яагаад гэвэл тэр хүмүүсийн байгуулсан шударга бусын хонгилоос айдаг. Тэр хүн бол “Шударга байцгаая” гэж гарч ирсэн Монгол Улсын Ерөнхийлөгч Ц.Элбэгдорж. Өөртэй нь үгсэн хуйвалдаагүй болохоор тэр хүн магадгүй “Авлигатай тэмцэхэд хэцүү боллоо” гэх зэргээр хэлэх байх. Гэвч бодит байдалд төрөөс төрсөн тэрбумтан, хуйвалдааны бүлэглэлүүдийн ард Ц.Элбэгдорж байна. Ардчиллыг хамгаалахын төлөө энэ бүлэглэлтэй тэмцэх ёстой” гэсэн юм. Харин Ц.Элбэгдорж “Алтанхуягийн мэдэгдлийг үзэв. Миний тухай ярихаас хэн ч айх учиргүй. Манай улсын давуу тал энэ юм даа. Хуулийн засаглалын төлөө хамтран ажиллая” гэж байсан юм.

Эх сурвалж: Шуурхай.мн